"ފެށި މަސައްކަތް ނިންމަން" ހޭޝްޓެގާއެކު ދަ ޑިމޮކްރެޓްސްގެ ގިނަ ޢަދަދެއްގެ މެންބަރުން "#އިބޫނޫންގޮތެއް" ހޯދައި، "އެމްޑީޕީ ރޫޅާލަން" ވަރުގަދަ ކެމްޕޭނެއް ފަށައިފިއެވެ.
ޑިމޮކްރެޓުންގެ މި ހަރަކާތުގެ މައި މަރުކަޒެއްގެ ގޮތުގައި ކަނޑައަޅާފައިވަނީ، އެ ޕާޓީގެ ރިޔާސީ ކެންޑިޑޭޓުގެ ކެމްޕޭން އޮފީހެވެ. މީގެ އިތުރުން އަތޮޅު ތެރޭގައި ގާއިމްކޮށްފައިވާ ކެމްޕޭން އޮފީސްތަކާއި، ކޯޑިނޭޓިންގ ކޮމިޓީ އެކުގައި މި މަސައްކަތުގައި ބައިވެރިވާނޭ ކަމަށް މިހަރަކާތުގައި އިސްކޮށް ހަރަކާތްތެރިވާ މެންބަރުން އަސްލުނިއުސްއަށް މަޢުލޫމާތުދެއެވެ.
ޑިމޮކްރެޓުންގެ ރިޔާސީ ކެންޑިޑޭޓުގެ ކެމްޕޭން މެނޭޖަރު މުޙައްމަދު ޔާސީން "އަސްލުނިއުސް"އަށް ވިދާޅުވީ، "މިއީ އެމްޑީޕީގެ ޑައިރެކްޝަން ގޯސްވެގެން، އެމްޑީޕީ ރަނގަޅުކުރާން އެމްޑީޕީން ތެރޭން އުފެދުނު ޚަރަކާތެއް" ކަމަށެވެ.
"ރާއްޖެއަށް ޑިމޮކްރެސީ ގެންނަށް އެމްޑީޕީން ކުރި މަސައްކަތް، އެމްޑީޕީގެ ވިސްނުމާ ފިކުރާ ބީރައްޓެހި ބަޔަކު އެމްޑީޕީ ތެރެއަށް ވަދެ، އަނެއްކާވެސް ޚުދުމުހުތާރު އަނިޔާވެރި ވެރިކަމަކަށް މިސްރާބު ޖެހުމުން، [ފިކުރެއްގެ ދިރުން] މިނަމުގައި، އަސްލު އެމްޑީޕީ މީހުން ނުކުމެ އުފެއްދި ޕާޓީ [ދަ ޑިމޮކްރެޓްސް]އަކީ،" އޭނާ ވިދާޅުވިއެވެ.
"ދަ ޑިމޮކްރެޓްސް އުފެއްދި މެންބަރުންގެ އިޙްސާސް ހުރީ، އިބޫ ނޫންގޮތެއް ހޯދައި، އެމްޑީޕީ ރޫޅާލުން"
ދަ ޑިމޮކްރެޓްސް އިން ރަސްމީކޮށް ނިންމާފައި ވަނީ، މިފަހަރުގެ ރިޔާސީ އިންތިޚާބުގެ ދެވަނަ ބުރުގައި އެއްވެސް މެންބަރަކަށް ތާޢީދު ނުކުރުމަށެވެ. ޕާޓީން ވަކިގޮތަކަށް ނިންމާފައި ވީ ނަމަވެސް، މެންބަރުންގެ ރޫހު ހުރީ، ޕާޓީ އުފެއްދި އެއް މަގުސަދު ކަމަށްވާ "އެމްޑީޕީ ރޫޅާލުމާއި" އަދި ރައީސް އިބްރާހީމް މުޙައްމަދު ޞާލިހުގެ ވެރިކަން ނިމުމަކަށް ގެނައުމެވެ.
އެގޮތުން، ޑިމޮކްރެޓްސްގެ ގިނަ ޢަދަދެއްގެ މެންބަރުން މިހާރު ވަނީ، ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒުގެ ރަނިންގމޭޓް ޙުސައިން މުޙައްމަދު (ސެމްބެ)އާއި އަދި ޕީޕީއެމް/ޕީއެންސީގެ އިސްބޭފުޅުން ހިމެނޭގޮތަށް މަޝްވަރާތަކެއް ކުރިއަށް ގެންގޮސްފައެވެ.
