ރައީސް ޑރ. މުޙައްމަދު މުޢިއްޒަށް ވަރަށް ބޮޑަށް ފާޑުވިދާޅުވެ، ދިވެހި ތާރީޚުގައިވެސް މިހާ އަވަހަށް އަވަހަކަށް އޮފުކެނޑުނު، އަދި އަމިއްލައަށް ވައްކަންކުރާ ވެރިޔަކު ނާންނަކަމަށް، ކުރީގެ ރައީސް އިބްރާހީމް މުޙައްމަދު ޞާލިހުގެ ސަރުކާރުން ކުރިއަށް ގެންދިޔަ ޣައިރުޤާނޫނީ ބިންވެރިޔާ ސްކީމް ހިންގުމުގައި އެންމެ އިސްކޮށް މަސައްކަތްކުރެއްވި އެއް ބޭފުޅެއް ކަމަށްވާ އޭރުގެ ހައުސިންގް މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.
ބިންވެރިކުރުމުގެ ނަމުގައި، ޤާނޫނުއަސާސީއާ ކަނޑައެޅިގެން ޚިލާފު އުސޫލުތަކެއްގެ ދަށުން، ހުޅުމާލޭގެ އެވޯޑް ވިނިންގ މާސްޓަރ ޕްލޭން، ބޯކިބަލެއްހެން ފޮތިފޮތިކޮށްލައި، ރާއްޖޭގެ އެންމެ އަގުބޮޑު ބިންތައް، ސިޔާސީ މަންފާއަށް، ވަކިބަޔަކަށް ލިބޭނޭގޮތަށް އޭރުގެ ސަރުކާރުން ބަހާލާފައި ވަނިކޮށް، އެ މައްސަލަތައް ބެލުމެއް ނެތި އަލަށް އައި ސަރުކާރުން، އޭރު ބަހާނުލެވި އޮތް ދެތިން ބިމެއް، ނުފޫޒުގެ ބޭނުންކޮށްގެން ބަޔަކަށް ދިންކަމުގެ ތުހުމަތުގައި މަޝްރަޙު ނުތަނަވަސް ވެފައިވާ މި ދަނޑިވަޅުގައި ރައްޔިތުން ދަނީ، އަދުގެ ސަރުކާރަށާއި ރައީސް ޑރ. މުޙައްމަދު މުޢިއްޒަށް ވެސް ވަރަށް ބޮޑަށް ފާޑު ކިޔަމުންނެވެ. އެގޮތުން އަކުރަމްވެސް ހިމެނި ވަޑައިގަންނަވާ ގޮތަށް ކުރީ ސަރުކާރުގެ އިސްވެރީންވެސް ދަނީ، އެޗްޑީސީން މިފަހުން ހިންގާފައިވާ "ގޯތި ސްކޭމް"ގެ މައްސަލައިގައި ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ.
ރައީސް މުޢިއްޒަށް ފާޑުވިދާޅުވެ، އެކްސްގައި އަކުރަމް ކުރެއްވި ޕޯސްޓެއްގައި އޭނާ ވިދާޅުވީ، "ރާއްޖޭ ގައި އަދި މިހާތަނަށް ވެރިކަމެއް ނުކުރޭ މިހާ އަވަހަކަށް އޮފުކެނޑުނު ވެރިޔެއް އަހަރު ނުވޭ ރައްޔިތުން މާޔޫސް ވެއްޖެ، ތާޢީދު ކޮށް ވޯޓް ލީ މީހުން ވެސް . އަދި އަމިއްލަ އަށް ވައްކަން ކުރަމުން ދާ ވެރިޔަކު ވެސް ނާދޭ" ކަމަށެވެ.
ކުރީ ސަރުކާރުން ހިންގި ބިންވެރިޔާ ސްކޭމުން ބަހާ ނުލެވި އޮތް ބިންތައް، އެޗްޑީސީ ތެރޭން ބަހާލާފައިވާ ކަމަށް ތުހުމަތުކުރެވޭ މައްސަލަ މިހާރު ދަނީ ކުރީން އެމައްސަލަ ބަލަން ނުކުޅެދުނު އޭސީސީންނާއި އަދި ދިވެހި ފުލުހުންގެ ޓީމަކުން ތަހުގީގުކުރަމުންނެވެ. މި މައްސަލަ ބަލަން މިހާރުގެ ޕްރޮސިކިއުޓަރ ޖެނެރަލް ވަނީ މި ދެމުއައްސަސާގެ މައްޗަށް އަމުރެއްވެސް ނެރެފައެވެ.
