އެތަކެއް ހާސް ރައްޔިތުން ތުހުމަތުކުރާ ގޮތުން ސިޔާސީ މަންފާތަކެއް ޙާޞިލްކުރުމަށް، ޤާނޫނުއަސާސީއާ ކަނޑައެޅިގެން ޚިލާފަށް ކުރީގެ ރައީސް އިބްރާހީމް މުޙައްމަދު ޞާލިހުގެ ސަރުކާރުން ކުރިއަށް ގެންދިޔަ މަޝްހޫރު "ބިންވެރިޔާ" ސްކީމާއި އަދި އެ ސަރުކާރުން ކުރިއަށް ގެންދިޔަ ''ގެދޮރުވެރިޔާ'' ސްކީމާ ގުޅޭ ފުރިހަމަ ޖިނާޢީ ތަހުޤީގެއް ހިންގުމަށް ދިވެހި ފުލުހުންގެ ޚިދުމަތަށާއި އެންޓި ކޮރަޕްޝަން ކޮމިޝަންގެ މައްޗަށް ޕްރޮސިކިއުޓަރ ޖެނެރަލް އަމުރުކުރައްވައިފިއެވެ.
މި މައްސަލައިގެ އަވަސް ތަޙުޤީޤެއް ހިންގުމަށް އަމުރުކުރައްވައި ޕްރޮސިއުޓަރ ޖެނެރަލް ޢައްބާސް ޝަރީފް ވިދާޅުވީ، " އަޅުގަނޑު މި އަމުރު މިކުރީ، މިކަމުގައި ގިނަ ރައްޔިތުންތަކެއްގެ ކަންބޮޑުވުންތަކެއް ހުރިއިރު އެ ކަންބޮޑުވުންތަކަށް ޙައްލެއް ލިބޭނީ މިކަމުގެ ފުރިހަމަ އަދި އަވަސް ތަޙުޤީޤެއް ހިންގައި ފިޔަވަޅު އަޅަންޖެހޭ ބަޔަކާމެދު ފިޔަވަޅު އެޅިގެންކަމަށް ޤަބޫލުކުރެވޭތީ،" ކަމަށެވެ.
ޤާނޫނުއަސާސީގެ 223 ވަނަ މާއްދާގެ (ޅ) ގެ ދަށުން ޕްރޮސިކިއުޓަރ ޖެނެރަލްއަށް ލިބޭ ބާރުގެ ދަށުން، ޕީޖީން ނެރުނު އަމުރުގައި ވަނީ، " ސަރުކާރުން ހިންގާ "ބިންވެރިޔާ'' އަދި ''ގެދޮރުވެރިޔާ'' ސްކީމަށް އެދި ފޯމު ބަލައިގަތުމުގައާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުޞޫލުތަކާއި ގަވާއިދުތަކާ ޚިލާފަށް ޢަމަލުކޮށްފައިވުމުގެ ކަންބޮޑުވުން ޕްރޮސިކިއުޓަރ ޖެނެރަލްގެ ސަމާލުކަމަށް އައިސްފައި" ކަމަށެވެ.
އަދި މި ކަމަކީ ޢާންމު މަސްލަޙަތު މަތީ މިންވަރަކަށް އެކުލެވޭ ކަމަކަށްވާތީ، މިއީ ފުރިހަމަ ޖިނާއީ ތަޙުޤީޤެއް ހިންގަންޖެހޭ ކަމެއްކަމަށް ޕްރޮސިކިއުޓަރ ޖެނެރަލް ދެކެވަޑައިގަންނަވާ ކަމަށެވެ.
ޕީޖީގެ ބަޔާނުގައި ވަނީ "ބިންވެރިޔާ" އަދި "ގެދޮރުވެރިޔާ" ސްކީމްގެ މަސައްކަތް ފެށުނީއްސުރެ މިއަދާ ހަމައަށް ހިނގާފައިވާ އެންމެހައި ކަންކަންމުގެ ފުރިހަމަ ޖިނާއީ ތަޙުޤީޤެއް ހިންގުމަށްފަހު، އެކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެމަ، އެކަން ތަޙުޤީޤުކުރުމަށްފަހު ދަޢުވާކުރުމަށްޓަކައި މިއޮފީހަށް ހުށަހެޅުމަށް، ދިވެހި ފުލުހުންގެ ޚިދުމަތަށާއި އެންޓި ކޮރަޕްޝަން ކޮމިޝަންގެ މައްޗަށް ޕްރޮސިކިއުޓަރ ޖެނެރަލް އަމުރުކުރައްވައިފައެވެ.
ރައީސް އިބްރާހީމްގެ ސަރުކާރުން ކަނޑައެޅިގެން ޤާނޫނުއަސާސީއާ ޚިލާފު އުސޫލުތަކެއް ހަދައި، މާލޭގެ އެތަކެއް ހާސް ރައްޔިތުންގެ ޙައްޤުތައް ނިގުޅައިގަނެ، މާލެ ސަރަހައްދުގައި މިވަގުތު އޮތް އެންމެ އަގުބޮޑު އެއް ބިން ކަމަށްވާ ހުޅުމާލޭގެ ދެވަނަ ފިޔަވަހި، ބޯކިބަލެއްހެން ފޮތިފޮތިކޮށްލައިގެން، ހިންގާފައިވާ މި ޣައިރުޤާނޫނީ ބިންވެރިޔާ ސްކީމާ ގުޅޭ ތަހުޤީގެއް ސަރުކާރުގެ ކަމާގުޅޭ އެއްވެސް މުއައްސަސާއަކުން މިހާތަނަށް ކުރިއަށް ގެންގޮސްފައި ނުވެއެވެ.
ނަމަވެސް، ކުއްލިއަކަށް މިފަދަ ތަހުގީގަކަށް އަދުގެ ޕީޖީ އަމުރުކުރައްވާފައި މިވަނީ، އަދުގެ ސަރުކާރުގެ ސިޔާސީ މަގާމުތަކުގައި ތިއްބެވި ބަޔަކު، މިދެންނެވި ސްކީމުގެ ނާޖާއިރު ފައިދާ ނަގައި، ކޮރަޕްޝަންގެ ތެރޭން އެތަނުން ބިންތަކެއް ނަގާފައިވާ ކަމުގެ ތުހުމަތުތަކެއް ކުރެވި، އާންމުންގެ ނުރުހުން ވަރަށް ބޮޑަށް ސަރުކާރަށް އަމާޒުވެފައިވާ ދަނޑިވަޅެއްގައެވެ.
ޤާނޫނީ ދާއިރާގެ ބައެއް ތަޖްރިބާކާރުންނާއި އަދި ރައްޔިތުންގެވެސް ގަބޫލުކުރާ ގޮތުގައި، މިފަދަ ތަހުގީގެއް ފުރަތަމަވެސް ހިންގައި، ޤާނޫނުއަސާސީގެ ރޫޙާ ކަނޑައެޅިގެން ދެކޮޅަށް ކުރިއަށް ގެންގޮސްފައިވާ މި ބާޠިލް ސްކީމް އުވާލައި، މި ބިޔަ ބޮޑު ޖަރީމާ ހިންގި ފަރާތްތައް ޤާނޫނުގެ ކުރިމައްޗަށް ގެނެސް، އަދި މި ކަމުގައި ގެއްލުން ލިބުނު ރައްޔިތުންނަށް އަދުގެ ސަރުކާރުންވެސް ރަނގަޅު ގޮތްތަކެއް ހޯދައި ދިންނަމަ މިފަދަ ކޮރަޕްޝަނާއި ފަސާދައިގެ ޢަމަލުތައް ހިންގާން ދައުލަތުގެ ތެރޭން ލިބޭ ޖާގަ ވަރަށް ބޮޑަށް ހަނިކުރެވުނީހެވެ.
