އެކްސް (ކުރީގެ ޓްވިޓަރ)ގައި ޙަސަން ކުރުސީގެ ނަމުގައި މިފަހަކަށްއައިސް ބައެއް ފަރާތްތަކާ ޒާތީވެ، އަދި އާންމުންނަށް އެނގެން ޖެހޭކަމަށް ރައްޔިތުން ގަބޫލުކުރާ ދައުލަތުގެ މުޙިއްމު ބައެއް ސިރުތައްވެސް ހާމަކުރަމުން އަންނަ އެކައުންޓް ސަސްޕެންޑުކުރިތާ މާކަ ގިނައިރުތަކެއް ނުވަނީސް އެ އެކައުންޓުގެ ސަސްޕެންޝަން އުވާލައިފިއެވެ.
ގާތްގަނޑަކަށް 14،300 ފޮލޮވަރސްއާއެކު ހަސަން ކުރުސީގެ ނަމުގައި ހިންގާ އެކައުންޓް އެކްސްއިން ސަސްޕެންޑްކުރީ މިއަދު ހެނދުނުގެ ވަގުތެއްގައެވެ. އަދި މެންދުރު ފަހު 2:15 ކަންހާއިރު އެކްސްއިން ވަނީ ކުރުސީގެ އެކައުންޓް ރީސްޓޯކޮށް، ސަސްޕެންޑް ކުރެވުނީ އޮޅުމަކުން ކަމަށާއި އަދި އެކަމަށް މަޢާފަށްވެސް އެދޭކަމަށް ބުނެފައެވެ.
ކުރުސީ ބުނީ، ފުލް ޕަރމަނަންޓް ބޭންއަކުން ފުލް ޕަރމަނެންޓް ރީސްޓޯއަކަށް ދިޔަ މިއީ ފުރަތަމަ ފަހަރުކަމަށެވެ.
ރިޔާސީ އިންތިޚާބު ކުޑަތަންވެފައިވާ މި ދަނޑިވަޅުގައި އެކައުންޓް ދާއިމަށް ބްލޮކްވެ، އަލުން ރީސްޓޯކުރުމުން ކުރުސީ ބުނީ، "މިއީ ފުރަތަމަ ފަހަރު އަހަރެންގެ އެކައުންޓް ޕާރމަނަންޓްކޮށް ބޭންކުރި. މީގެ ކުރީން ކޮންމެ ފަހަރަކުވެސް ވަކި ވަގުތަކަށް އެކައުންޓް ލޮކްކުރަނީ" ކަމަށެވެ.
ސިޔާސީ ގިނަ ފަރާތްތަކެއް ގަބޫލުކުރާ ގޮތުގައި ހަސަންކުރުސީގެ ނަމުގައި ހިންގާ އެކައުންޓަކީ ކުރީގެ ރައީސް ނަޝީދު އަޑިގައި ހުންނަވައިގެން ހިންގަވާ ވަގު އެކައުންޓެކެވެ. ނަމަވެސް ރައީސް ނަޝީދުވެސް ވަނީ، އެއީ އެމަނިކުފާނުގެ އެކައުންޓެއް ނޫންކަމަށާއި އަދި އެއީ ކާކުތޯ ބަލައި ދިނުމަށް އެ މައްސަ ފުލުހުންނަށްވެސް ހުށަހަޅުއްވައިފައެވެ.
