ކުރިއަށް އޮތް ރިޔާސީ އިންތިޚާބުގައި އަމިއްލަގޮތުން ވާދަކުރައްވާ ކުރީގެ ހޯމް މިނިސްޓަރު ޢުމަރު ނަސީރަށް މަރުގެ އިންޒާރުތަކެއް ދެމުން އަންނަކަމަށް އޭނާ ވިދާޅުވެއްޖެއެވެ.
ޢުމަރު ވަނީ އޭނާއަށް އިންޒާރު ދީ، ފޮނުވާފައިވާ މެސެޖްތައް ސޯޝަލް މީޑިއާގައި ހިއްސާކުރައްވައިފައެވެ. އޭނާ ވިދާޅުވީ، މަސްތުވާތަކެތީގެ ބޮޑުން ކަމަށް ބެލެވޭ ފަރާތްތަކުން އޭނާއަށް ތަފާތު އިންޒާރުތައް ދެމުން އަންނަ ކަމަށެވެ.
" ތަފާތު މަރުގެ އިންޒާރު ލިބެމުން ދާތީ މިކަން ވާނީ އެމް،އެން،ޑީ،އެފްގެ ސަމާލުކަމަށް ގެނެސްފަ،" ކަމަށް ވެސް އޭނާ ވަނީ ވިދާޅުވެފައެވެ.
މިފަހަރުގެ ރިޔާސީ ކެމްޕޭނުގައި އުޅުއްވަނިކޮށް، މާލޭ މަގުމަތިން މީހަކު ޢުމަރަށް ދަގަނޑުބުރިއަކުން ހަމަލާދިން މައްސަލައެއްވެސް އޭނާ ވަނީ ސަލާމަތީ ބާރުތަކުގެ ސަމާލުކަމަށް ގެނެސްފައެވެ.
ޢުމަރު "އަސްލު ނިއުސް"އަށް އޭރު ވިދާޅުވީ، އޭނާ މާލޭގައި ކުރިއަށް ގެންދެވި ރޯޑް ރެލީއެއް ކުރިއަށް ދަނިކޮށް، " ޑްރަގް ވިއްކާ މީހެއްކަމަށް ތުހުމަތު ކުރެވޭ މީހަކު ވަނީ ދަގަނޑު އެއްޗެއް އެއްލައި އަޅުގަނޑުގެ މޫނުމަތީ ޖެހުމަށް ފަހު ފިލާފައި،" ކަމަށެވެ.
ޢުމަރަކީ މިފަހަރުގެ ރިޔާސީ ކެންޑިޑޭޓުންގެ ތެރޭން، މަސްތުވާތަކެތީގެ މައްސަލަތަކާއި މާރާމާރީއާއި ވައްކަންކުރުން ފަދަ ކަންކަން ހައްލުކޮށްދޭން އެންމެ ވަރުގަދައަށް އަޑުއުފުއްލަވަމުން ގެންދަވާ ކެންޑިޑޭޓުކަން ފާހަގަކޮށްލާން ޖެހެއެވެ.
