ވަރުގަދަ ސިޔާސީ ޕާޓީތަކުގެ ލީޑަރުން ފަހަތަށް ޖައްސާލުމަށް ފަހު، ނޭޝަނަލް ޕީޕަލްސް ޕަވާ (އެންޕީޕީ)ގެ ލީޑަރު އަނޫރާ ކުމާރާ ޑިސަނަޔަކަ (އޭކޭޑީ) ސްރީލަންކާގެ ނުވަ ވަނަ ރައީސަކަށް ރަސްމީކޮށް އިންތިހާބުވެއްޖެއެވެ.
ހޮނިހިރު ދުވަހު ބޭއްވި އިންތިޚާބުގެ ވޯޓު ދެވަނަބުރަށް ގުނައި، ލަންކާގެ އިލެކްޝަންސް ކޮމިޝަނުގެ ޗެއާމަން އާރްއެމްއޭއެލް ރަތުނަޔަކަ މިކަން އިއުލާން ކުރެއްވީ އާދީއްތަ ދުވަހުއެވެ. ރަތުނަޔަކަ ވިދާޅުވީ، ފުރަތަމަ ގުނުމުގައި އެއްވެސް ކެންޑިޑޭޓަކަށް 51 އިންސަތަ ހަމަ ނުކުރެވޭތީ ދެވަނަ ބުރަށް ވޯޓު ގުނައިގެން، އޭކޭޑީ އިންތިހާބުކުރެއްވީ ކިއުމިއުލޭޓިވް ވޯޓާއި ޕްރެފަރެންޝަލް ވޯޓަށް ބަލައިގެން ކަމަށެވެ.
ހޮނިހިރު ދުވަހު ބޭއްވި، 2024 ވަނަ އަހަރުގެ ރިޔާސީ އިންތިޚާބުގައި ލަންކާގެ އެކި ކަންކޮޅުތަކުގައި ނެގި ވޯޓުން އޭކޭޑީއަށް އެންމެ ފުރަތަމަ ލިބިވަޑައިގަތީ، 42.31 އިންސައްތައެވެ.
ސްރީލަންކާގެ ރިޔާސީ އިންތިޚާބުގައި އެއްވެސް ކެނޑިޑޭޓަކަށް 51 އިންސައްތައަށްވުރެ ގިނަ ވޯޓު ލިބިފައި ނުވާތީ، އެންމެ ކުރި ހޯއްދެވި އަނޫރާ ކުމާރަ ޑިސަނަޔަކަ އާއި ސަޖިތު ޕްރޭމަދާސާއަށް ދެން ބެލީ، ވޯޓުލީ މީހުން އިސްކަންދޭ ވޯޓަށް ބަލައިގެންނެވެ. އެގޮތުން މި ދެ ކެންޑިޑޭޓުންނަށް ލިބުނު ޕްރިފަރެންސް ވޯޓް ގުނުމުން އެންމެ ގިނަ ވޯޓު ހޯއްދެވީ އޭކޭޑީއެވެ.
ސްރީލަންކާގެ އިލެކްޝަންސް ކޮމިޝަނުން އޭކޭޑީގެ ކާމިޔާބީ އިއުލާނުކުރިއިރު، މިހާރުގެ ރައީސް ރަނިލް ވިކްރަމަސިންހަ ފިޔަވައި އެހެން ކެންޑިޑޭޓުން ވަޑައިގެން ތިއްބެވިއެވެ.
