އެމެރިކާގެ ޔަހޫދީން ހިމާޔަތްކޮށް "ޔަހޫދީންނަށް ނަފްރަތުކުރާ މީހުން" އެގައުމުން ނައްތާލާނެ ކަމަށް އެމެރިކާގެ ކުރީގެ ރައީސް ޑޮނާލްޑް ޓްރަމްޕު ވައުދުވެވަޑައިގެންފިއެވެ.
އޭނާ މިހެން ވިދާޅުވީ، ފަލަސްތީނުގެ ބިންތަކަށް ގަދަކަމުން ވެރިވެގަނެގެން ތިބި ސަހްޔޫނީންނާ ދެކޮޅަށް، ހަމާސްގެ މުޖާހިދުން އޮކްޓޯބަރު މަހުގެ 7 ވަނަ ދުވަހު ދިން ހަމަލާގެ ހަނދާންތައް އާކުރުމަށް ފްލޮރިޑާގައި ބޭއްވި ހަނދާނީ ހަފްލާއެއްގައެވެ.
އިސްރާއީލާ ދެކޮޅަށް އެމެރިކާގެ ސްކޫލްތަކާއި ޔުނިވަރސިޓީ ދަރިވަރުން ކުރަމުންދާ މުޒާހަރާތަކަށް ވަރަށް ބޮޑަށް ފާޑު ވިދާޅުވެ، ޓްރަމްޕު ވަނީ މިއީ ޑިމޮކްރެޓިކް ޕާޓީން އިސްނަގައިގެން ސަހްޔޫނީންނާ ދެކޮޅަށް ކުރާ ކަންތައްތަކެއް ކަމަށްވެސް ތުހުމަތުކުރައްވައިފައެވެ. އަދި ޑިމޮކްރެޓުންނަށް ވޯޓުދޭ ޔަހޫދީންނަކީ އިޒްރޭލާއި އެމީހުންގެ ދީނަށް ނަފްރަތުކުރާ މީހުންކަމަށްވެސް އޭނާ ސިފަކުރެއްވިއެވެ.
މީގެ އިތުރުން އިޒްރޭލުގެ އިސްތިޢުމާރީ ދައުލަތުގައި ހުރި އެމެރިކާގެ އެމްބަސީ ގުދުސްއަށް ބަދަލުކުރުން ފަދަ ޔަހޫދީންނާ އެއްކޮޅު ބޮޑެތި ކަންކަން މީގެ ކުރިން ވެސް ކުރެއްވީ އޭނާކަން ފާހަގަކުރެއްވިއެވެ.
ޓްރަމްޕް ވިދާޅުވީ އޭނާ އަލުން އިންތިހާބުވެއްޖެ ނަމަ އެމެރިކާ އާއި އިޒްރޭލާ ދެމެދު އޮންނަ ގުޅުން އިތުރަށް ބަދަހިވެގެންދާނެ ކަމަށެވެ.
