އައްޑޫގެ ގުޅިފައިވާ ރަށްތަކުން ފެނުގެ ހިދުމަތް މެދުކެނޑިފައި އޮންނަތާ 48 ގަޑިއިރަށް ވުރެ ގިނައިރުވެއްޖެއެވެ.
އައްޑޫގެ ގުޅިފައިވާ ރައްތަކަށް ޚިދުމަތް ދޭ ފެން ޕްލާންޓަށް މައްސަލައެއް ދިމާވެ، ފެނުގެ ޚިދުމަތް ކެނޑުނީ ބުރާސްފަތި ދުވަހު ހެނދުނުއެވެ. މިއީ އާރްއޯ ޕްލާންޓުގެ ވީއެފްޑީ ޑްރައިވަށް ދިމާވި މައްސަލައެއް ކަމަށް ފެނަކައިން ބުނެއެވެ. މިމައްސަލަ ހައްލު ކުރުމަށް، ފެނަކައިން ހުކުރު ދުވަހު އިރުއޮއްސުނު އިރު ސްޕެއަރ އެއް ފޮނުވިއެވެ. ނަމަވެސް އެ ޑްރައިވް މަސައްކަތް ނުކުރި ކަމަށް ފެނަކައިން ބުނެއެވެ.
އެ ރަށްތަކަށް ސްޕްލައި ފެނުގެ ހިދުމަތް ދޭ ފެނަކަ ކޯޕަރޭޝަންގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ބައެއް މީޑިއާތަކަށް މައުލޫމާތު ދެއްވަމުން ވިދާޅުވީ އެމްޑަބްލިއުއެސްސީއާ ވާހަކަދައްކައިގެން އިތުރު ވީއެފްޑީ ޑްރައިވެއް އައްޑު އަށް ފޮނުވުމުގެ މަސައްކަތް މިހާރު ކުރަމުން އަންނަ ކަމަށެވެ.
އައު ޔުނިޓެއް ފޮނުވާއިރު މިފަހަރު އެއާއެކު އެމްޑަބްލިއުއެސްސީގެ އިންޖިނިއަރުންވެސް ފޮނުވަން މަސައްކަތް ކުރަމުންދާ ކަމަށް މުއާޒް ވިދާޅުވިއެވެ.
