ދަތުރުވަރެއްގައި އިންޑިއާއަށް ގޮސް ހުރި ދިވެހި އަންހެނަކު، ބުދަދުވަހުގެ ރޭ މަޣްރިބް ނަމާދަށް ހުއްޓައި ނިޔާވެއްޖެއެވެ.
ނަމާދަށް ހުއްޓައި ނިޔާވެފައި ވަނީ، ފ. ނިލަންދޫ، ފަހަމާ، އުމުރުން 57 އަހަރުގެ ޒައިނަބު ސުލައިމާން ކިޔާ މީހެކެވެ.
ފ. ނިލަންދޫން އޮންލައިން ނޫސް ސީއެންއެމްއަށް މައުލޫމާތު ދިންމީހަކާ ހަވާލާދީ އެނޫހުން ރިޕޯޓުކޮށްފައިވާ ގޮތުން، ޒައިނަބަކީ އޭނާގެ ފިރިމީހާ، ޢަބްދުއް ނާޞިރާއެކު ވަރަށް ގިނައިން އިންޑިއާއަށް ދަތުރުކުރާ މީހެކެވެ. އަދި މިފަހަރުވެސް އޭނާ އިންޑިއާއަށް ދިޔައީ، ފިރިމީހާއާއެކު ކަމަށާއި މިހަފްތާތެރޭ އެނބުރި އަންނަ ގޮތަށް ކަމަށެވެ.
އެގޮތުން މިރޭ ޒައިނަބް މަޣްރިބް ނަމާދަށް ހުއްޓައި ކުއްލިއަކަށް ނިޔާވެގެން ވެއްޓުނީ ކަމަށެވެ. އަދި އޭނާއަކީ ސީރިއަސް ބައްޔަކަށް ފަރުވާކުރާ މީހެއް ނޫންކަމަށްވެސްވެއެވެ.
މީގެ އިތުރުން ޒައިނަބަކީ ވަރަށް ހިތްތިރި މީހެއްކަމަށާއި، އެ ދެމަފިރީންނަކީވެސް މީހުންނަށް ވަރަށް ހެޔޮ، ވަރަށް ރަނގަޅު ވަރަށް ހިތްހެޔޮ ދެމަފިރިންކަމަށާއި ޒައިނަބުގެ ކުއްލި ވަކިވުމަކީ މުޅިރަށަށްވެސް ލިބުނު ބޮޑު ހިތާމައެއް ކަމަށެވެ.
