އީރާނުގެ އިރުދެކުނު ސަރަހައްދުގައި އޮންނަ ޗާބަހާރުގައި ވަރުދަގަ ވިޔަފާރީގެ ބަނދަރެއް ތަރައްގީ ކުރުމަށް އިންޑިއާ އާއި އީރާނުން ވަނީ 10 އަހަރުގެ ބޮޑު އެއްބަސްވުމެއް އެކުލަވާލަވާލައިފައެވެ. އެގޮތުން މި އެއްބަސްވުމުގައި ދެ ގައުމުގެ އޮފިޝަލުން ސޮއިކުރެއްވީ، ތެހެރާނުގައި މެއި 13، 2024ގައެވެ.
އިންޓަނޭޝަނަލް ނޯތު-ސައުތު ޓްރާންސްޕޯޓް ކޮރިޑޯ (އައިއެންއެސްޓީސީ) އަކީ އިންޑިއާ އާއި ރަޝިއާ އާއި ޔޫރަޕް އީރާން މަގުން ގުޅާލުމުގެ މަގްސަދުގައި އެކުލަވާލާފައިވާ ކޮރިޑޯއެކެވެ. އެގޮތުން، ޗަބާހަރު ބަނދަރު ތަރައްގީކުރުމަށް ބޭނުންވާ ސާމާނަށް އިންޑިއާއިން 120 މިލިއަން ޑޮލަރު ހޭދަކުރާނެއެވެ. އަދި ބަނދަރުގެ ވަށައިގެންވާ އިންފްރާސްޓްރަކްޗާއަށް އިތުރު 250 މިލިއަން ޑޮލަރު ޚަރަދުކުރުމަށް ވަނީ ނިންމާފައެވެ.
ހުޅަނގާއި އެމެރިކާގެ އުނދަގުލާ ހެދި، އީރާނަށް އޭޝިއާއާއި އިރުމަތީގެ ސަރަޙައްދުތަކަށް ދަތުރުކުރުމަށް ހުރަސް އެޅެއެވެ. އެހެންކަމުން ޗަބަހާރަކީ ވިޔަފާރީގެ މަގުތައް ފުޅާކުރުމަށް އެގައުމަށް މުހިންމު ސަރަހައްދެކެވެ. އީރާނުގެ މި ބަނދަރުގެ ސަބަބުން ހުޅަނގުގެ ކޮންޓްރޯލުން އެއްކިބާވެ، ރަޝިއާއާއި އިންޑިއާ އަދި އީރާނު، ކަނޑުދަތުރުގެ އާ މަގަކުން ގުޅާލާނެއެވެ.
ގާތްގަނޑަކަށް 7،200 ކިލޯމީޓަރުގެ ދިގު މި ރާސްތާ ގުޅުވާލަދޭ މުޙިއްމު ބަނދަރުގެ ސަބަބުން މި ގައުމުތަކުގެ ވިޔަފާރީގެ ދާއިރާ އިތުރަށް ފުޅާވެ، އިރުމަތީ ޔޫރަޕާއި، މެދުތެރޭ އަދި އުތުރު އޭޝިއާގެ ގައުމުތަކާއެކު ކުރެވޭ ވިޔަފާރީގެ މުޢާމަލާތްތައް އިތުރުވެ މި ގައުމުތަކަށް، ޒަމާންވީ ޢާންމު ކަނޑުމަގުތަކަށް ބަރޯސާވުން ކުޑަކުރެވޭނެއެވެ.
މިއީ ހަމަ ޔަގީނުންވެސް، އީރާނާއި، ރަޝިއާއާ ދެމެދު ޒަމާންވީ ދުޝްމަނުކަމެއް ގެންގުޅޭ އެމެރިކާއާއި، ހުޅަނގުގެ ބާރުތަކަށް، ވަރަށް އަސަރުކުރާނޭ ކަމެއްގެ ގޮތުގައި މަސްރަޙް ދިރާސާކުރާ ފަރާތްތަކުން ސިފަކުރެއެވެ.
