ދިވެހީންގެ ޤައުމީ ބޭންކު (ބޭންކް އޮފް މޯލްޑިވްސް)ގެ އޭޓީއެމް އަދި ޕީއޯއެސް ޓަރމިނަލްތަކުގައި ރުޕޭ ކާޑު ބޭނުންކުރެވޭ ގޮތް އެ ބޭންކުން މިވަނީ ހަމަޖައްސައިފައެވެ. އަދި ގައުމީ ބޭންކުން މި ހޯދި ބޮޑު ކުރިއެރުމާއެކު ރައްޔިތުން މިތިބީ އޭގެ ފައިދާ ލިބުމުގެ އިންތިޒާރުގައެވެ.
ބީއެމްއެލްއިން މައުލޫމާތުދީފައިވާ ގޮތުން ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި)ގެ ޕްރޮޑަކްޓެއްކަމަށްވާ ރުޕޭ އަކީ މިހާރު ދުނިޔޭގެ 300 މިލިއަން އަށް ވުރެ ގިނަ މީހުން ބޭނުންކުރަމުންދާ އިންޑިއާގެ ފުރަތަމަ ގްލޯބަލް ކާޑު ޕޭމަންޓް ނެޓްވޯކްއެކެވެ. އެހެންކަމުން މިފަދަ ނެޓްވޯކެއްގެ ތެރެއަށް އެ ބޭންކަށް ވަދެވުމަކީ ބޮޑު އުފަލެކެވެ.
ބީއެމްއެލްގެ ޑައިރެކްޓަރ އޮފް ރީޓެއިލް، ބިޒްނަސް އެންޑް އެސްއެމްއީ ބޭންކިންގ މޫސާ ނިމާލް ވިދާޅުވަނީ " ރާއްޖޭގައި ރުޕޭ ކާޑު ބަލައިގަތުން މަގުފަހިކުރުމަށް ނޭޝަނަލް ޕޭމަންޓް ކޯޕަރޭޝަން އޮފް އިންޑިއާ އާއެކު ބައިވެރިވެވޭކަމީ އަޅުގަނޑުމެންނަށް ލިބޭ އުފަލެއް." ކަމަށެވެ.
އޭނާ އިތުރަށް ވިދާޅުވީ، "އިންޑިއާގެ ރީޓެއިލް ޕޭމަންޓް ސިސްޓަމްތަކަށް ރުޕޭގެ ސަބަބުން ފާހަގަކޮށްލަންޖެހޭފަދަ ބޮޑު ބަދަލެއް އައިސްފައިވާއިރު، ރާއްޖޭގެ އެންމެ ފުޅާ ބޭންކިންގ ނެޓްވޯކްގައި، ބޭންކް އޮފް މޯލްޑިވްސް އިން ރުޕޭ ކާޑުގެ ހިދުމަތް ދޭން ފެށުމާއެކު ރުޕޭ ކަސްޓަމަރުންނަށް ފައިސާ ދެއްކުން ވަރަށް ބޮޑަށް ފަސޭހަވެގެންދާނެ." ކަމަށެވެ.
ގައުމީ ބޭންކުން މައުލޫމާތުދޭގޮތުގައި މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 39 ބްރާންޗް، 88 ސެލްފްސަރވިސް ބޭންކިންގ ސެންޓަރ، 143 އޭޓީއެމް، 7000 އަށް ވުރެ ގިނަ މާރޗަންޓުންނާއި ކޭޝް އޭޖެންޓުގެ ހިދުމަތުގެ އިތުރުން އެންމެ ޒަމާނީ އޮންލައިން ބޭންކިންގ ހިދުމަތް އެބަ ފޯރުކޮށްދެވެއެވެ. އެހެންކަމުން ރުޕޭ ކާޑު ރާއްޖޭގެ ހުރިހާ ސަރަހައްދެއްގައިވެސް ބޭނުންކުރެވޭނެވެ.
އަލަށް ތައާރަފުކުރި ރުޕޭ ކާޑުގެ ސަބަބުން، ބޭންކަށް ވަންނަ ފައިސާ އިތުރުވާނެއެވެ. އަދި އިންޑިއާ ފަތުރުވެރީންނާއި ރާއްޖޭގެ ފަތުރުވެރިކަމުގެ ސިނާޢަތުގައި ހަރަކާތްތެރިވާ ވިޔަފާރިތަކަށް، ފައިދާވި ނަމަވެސް، ރާއްޖެއަށް ވަންނަ ޑޮލަރު މަދުވުމާއި، އަދި މިހާރުވެސް ޑޮލަރުގެ ސަބަބުން ރައްޔިތުންނަށް ކުރަމުންދާ ނޭދެވޭއަސަރު އިތުރަށް ގޯސްވެދާނެތީ ރައްޔިތުންގެ މެދުގައި ވަނީ ވަރަށް ބޮޑަށް ކަންބޮޑުވުން އުފެދިފައެވެ.
