ދިވެހި ރައްޔިތުންނަށް އަތްފޯރާފަށުގައި ބޯހިޔާވަހިކަން ފޯރުކޮށްދިނުމާ ގުޅޭ ގޮތުން، އިންޑިއާ ސަރުކާރާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޝްވަރާކުރައްވައިފިއެވެ.
ރައީސް މުޢިއްޒު މިހާރު އިންޑިއާއަށް ކުރައްވަމުން ގެންދަވާ 5 ދުވަހުގެ ފުރަމާނަ ދަތުރުފުޅުގައި، އާދީއްތަ ދުވަހު އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ. ސުބްރަމާނިއަމް ޖައިޝަންކަރާ ބައްދަލުކުރައްވައި ދެއްކެވި ވާހަކަފުޅުގައި ވަނީ، ސީދާ ދިވެހި ރައްޔިތުންނަށް ލާބައާއި މަންފާލިބޭ ދާއިރާތަކާ ގުޅޭގޮތުން މަޝްވަރާކުރައްވައިފައެވެ. އެގޮތުން، އަތްފޯރާފަށުގައި ބޯހިޔާވަހިކަން ފޯރުކޮށްދިނުމާއި، ފެންވަރު ރަނގަޅު ޞިއްޙީ ޚިދުމަތް ދިނުމާއި، ފަތުރުވެރިން އަންނަ މިންވަރު އިތުރުކުރުމާއި، މުޅި ޤައުމުގައި މަސްވެރިކަމާއި ދަނޑުވެރިކަން ފުޅާކުރުން ފަދަ ކަންކަމާ ގުޅޭގޮތުން އެ ދެބޭފުޅުން މަޝްވަރާކުރެއްވިއެވެ.
ވެރިކަމަށް ވަޑައިގަތުމުގެ ކުރީން ރައްޔިތުންގެ ތާޢީދު ހޯއްދެވުމަށް ކުރިއަށް ގެންދެވި، "އިންޑިއާ އައުޓް" ކެމްޕޭނުގެ ސަބަބުން، ރާއްޖެއާއި އިންޑިއާގެ ގުޅުން ހީނަރުވެފައިވާ މި ދަނޑިވަޅުގައި ޑރ. މުޢިއްޒު އިންޑިއާއަށް ކުރައްވާ ދެވަނަ ދަތުރުފުޅުގައި ވަނީ، ދެ ސަރުކާރުގެ ގުޅުން އިތުރަށް ބަދަހިކޮށް، ފަރުދީ ފެންވަރުގައި އޮންނަ ގުޅުންތައް ވެސް ހަރުދަނާކުރުމަށް އެއްބަސްވެވަޑައިގެންފައެވެ.
ރައީސް ޑރ. މުޢިއްޒުގެ މި ދަތުރުފުޅަކީ، އިންޑިއާގެ ރައީސް ދުރޫޕަދީ މުރުމޫގެ ދަޢުވަތަކަށް ކުރައްވާ ފުރަމާނަ ދަތުރުފުޅެކެވެ. މި ދަތުރުފުޅުގައި ރައީސްގެ ދެކަނބަލުންނާއި ރާއްޖޭގެ ވަފުދު އިންޑިއާއަށް ވަޑައިގަތީ އިންޑިއަން އެއަރފޯސްގެ މަތިންދާ ބޯޓެއްގައެވެ.
