ދިވެހިރާއްޖޭގެ މަރުކަޒީ ބޭންކު (އެމްއެމްއޭ) އިން މިހާރު ހަދާފައިވާ ޑޮލަރު ގަވާއިދު އަންނަ ޖެނުއަރީން ފެށިގެން ފުރިހަމައަށް ތަންފީޒުކޮށް، 2026 ވަނަ އަހަރުގެ ފުރަތަމަ 3 މަސް ދުވަހުގެ ތެރޭގައި، މިހާރު ރާއްޖޭން ބޭރަށް ފުރާ ދިވެހީންނަށް ޓިކެޓަށް ދޫކުރާ 500 ޑޮލަރުގެ ބަދަލުގައި 1000 ޑޮލަރު ލިބޭނޭގޮތް ހަމަޖައްސައި ދެއްވާނޭކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ. މުޢިއްޒުގެ ސަރުކާރަށް 52 ހަފްތާ ފުރުން ފާހަގަކުރުމަށް، ބޭއްވި ޚާއްސަ ރަސްމިއްޔާތުގައި އެމަނިކުފާނު ވިދާޅުވީ، ގަވާއިދަށް ތަބާވުމަކީ އެންމެންގެ މައްޗަށް ލާޒިމު ކަމެެއް ކަމަށާއި، ރިސޯޓުތަކާއި ގެސްޓްހައުސްތަކަށް ލިބޭ ޑޮލަރުގެ ތެރެއިން ވަކި މިންވަރެއް ބޭންކްތަކަށް މާރުކުރަންޖެހޭ ގޮތަށް އެމްއެމްއޭ އިން ހަދާފައިވާ ގަވާއިދު ބަދަލުނުކުރައްވާނޭ ކަމަށެވެ.
އަދި، އެގަވާއިދުގެ ދަށުން ޑޮލަރު މާރުކުރުމުގެ ކަންކަން ފަތުރުވެރިކަމާ ބެހޭ ވުޒާރާގެ އެއްބާރުލުމާ އެކުގައި ކުރިއަށް ގެންގޮސް، މިހާރު ވީއައިއޭއިން ފުރާ ކޮންމެ ދިވެއްސަކަށް ޓިކެޓަށް، ގައުމީ ބޭންކުން ދޫކުރާ 500 ޑޮލަރުގެ ބަދަލުގައި، ބޭންކު ރޭޓުން 1000 ޑޮލަރު ލިބޭނޭގޮތް ހަމަޖެހިގެން ދިއުމަކީ ރައްޔިތުންނަށް ލިބިގެންދާނޭ ވަރަށް ބޮޑު ލުޔެއް ކަމަށެވެ.
މީގެ އިތުރުން ޑޮލަރު ގަވާއިދު ފުރިހަމައަށް ތަންފީޒުކުރެވޭ ނަމަ، މިހާރު ބީއެމްއެލްގެ ކްރެޑިޓް ކާޑަށް ދޫކުރާ 750 ޑޮލަރުގެ ބަދަލުގައި އެ ލިމިޓް، 1400 ޑޮލަރަށް ބޮޑުކުރާނޭކަމަށްވެސް ރައީސް ޑރ. މުޢިއްޒު ވިދާޅުވިއެވެ.
ރާއްޖޭގެ ފަތުރުވެރިކަމުގެ ފުރިހަމަ މަންފާ، ވޭތުވެދިޔަ ބައިގަރުނަށްވުރެ ދިގު މުއްދަތެއްގައި މަދުބަޔަކަށް ބެހިގެން ދިޔައިރު، ޑޮލަރުގެ މުއްސަނދިކަން ލިބިފައިވާ މި ދިވެހިރާއްޖޭގައި ދިރިއުޅޭ ދިވެހީންގެ ކުޑަކުޑަ އާބާދީ ތާއަބަދު އުޅެން ޖެހިފައިވަނީ، މަހުޖަނުންނަށާއި ސިޔާސީ ފަރާތްތަކަށް ސަލާންޖެހުމުގައެވެ. އަދި ކިޔެވުމާއި ބޭސްފަރުވާއައަށް ނަމަވެސް ނުވަތަ އެނޫން ޒަރޫރީ ބޭނުމެއްގައިވެސް ޑޮލަރެއް ހޯދަން ވެއްޖެ ނަމަ ޖެހެނީ، މި ދެންނެވި ޑޮލަރުގެ މުއްސަނދިކަން ހޯދާފައިވާ ފަރާތްތަކުން ޒަމާނުއްސުރެން އުފައްދާފައިވާ، ކަޅުބާޒާރުން އަގުބޮޑުކޮށް ޑޮލަރުގަންނާށެވެ.
ރިސޯޓުތަކާއި ގެސްޓްހައުސްތަކަށް ލިބޭ ޑޮލަރުގެ ތެރެއިން ވަކި މިންވަރެއް ބޭންކްތަކަށް މާރުކުރަންޖެހޭ ގޮތަށް އެމްއެމްއޭއިން ގަވާއިދު ހެދުމުން، ފަތުރުވެރިކަމުގެ ސިނާއަތުގައި އެންމެ ދުވަސްވީ، އަދި އެންމެ ބޮޑެތި ބައެއް ވިޔަފާރިވެރީން، އެގަވާއިދަށް ޢަމަލުނުކުރާނޭކަމަށާއި އެ ގަވާއިދު އަނބުރާ ގެންދިއުމަށް ގޮވާލައި ސަރުކާރަށް ގޮންޖަހައިފައެވެ.
