ގައުމީ ޔުނިވާސިޓީ ލެކްޗަރާ އަލީ ހަފީޒް، މިދިޔަ ޖޫން މަހުގެ 28 ވަނަ ދުވަހު ފަތިސް ނަމާދުން ފައިބައިގެން މަޖީދީ މަގު ހުރަސްކުރައްވަނިކޮށް ބާރު ސްޕީޑުގައި ދުއްވާފައި އައި ސައިކަލެއްގައި ޖެހި ސީރިއަސް އަނިޔާތަކެއް ލިބުނު މައްސަލައިގައި، އެކްސިޑެންޓްވި ސައިކަލް ދުއްވާން އިން ޒުވާނާގެ ބަންދަށް އިތުރު 15 ދުވަސް ކްރިމިނަލް ކޯޓުން ޖަހައިފިއެވެ.
އެކްސިޑެންޓްވި ސައިކަލް ދުއްވާން އިނީ ޢުމުރުން 22 އަހަރުގެ ޝަމްޢާން ޢަބްދުއްޝަކޫރެވެ. ހަފީޒްގެ ފުރާނައަށް ނުރައްކާވާފަދަ މި އެކްސިޑެންޓާ ގުޅިގެން ފުލުހުން ޝަމްޢާން ހައްޔަރުކުރީ މި ޖުލައި މަހުގެ 3 ވަނަ ދުވަހުއެވެ.
އެކްސިޑެންޓާ ގުޅިގެން ލިބުނު އަނިޔާތަކަށް އިންޑިއާގައި ހަފީޒަށް ފަރުވާދެމުން އަންނައިރު، އޭނާގެ އާއިލާއިން ބުނެފައިވަނީ، ދެ ސަރޖަރީއަކަށް ފަހު، މިހާރު ވެންޓިލޭޓަރުން ނަގާފައިވާ ކަމަށެވެ.
މި އެކްސިޑެންޓާ ގުޅިގެން ހައްޔަރުކުރި ޝަމްއާނުގެ ބަންދަށް ފުރަތަމަވެސް ކްރިމިނަލް ކޯޓުން ޖެހީ 15 ދުވަހެއެވެ. އަދި އެ މުއްދަތު ހަމަވުމުން ބުދަ ދުވަހު ކޯޓަށް ގެންދިއުމުން ވަނީ، އިތުރު 15 ދުވަސް ޖަހައިފައެވެ.
