ޖުމްހޫރީ ޕާޓީ (ޖޭޕީ) ގެ އެތެރޭގެ އިންތިހާބު މިއަދު ބާއްވަން ތައްޔާރުވެއްޖެއެވެ.
އެ ޕާޓީގެ އެކިއެކި މަގާމުތަކަށް ބޭފުޅުން އިންތިހާބުކުރަން ބާއްވާ އިންތިހާބު ފެށުމަށް ހަމަޖެހިފައި ވަނީ މިއަދު މެންދުރު ފަހު 2:00 ގައެވެ. މި އިންތިހާބުގައި ޕާޓީގެ 11 މަގާމަކަށް ބޭފުޅުން އިންތިހާބު ކުރާނެއެވެ.
މީގެ ތެރޭގައި ޑެޕިއުޓީ ލީޑަރާއި އަންހެނުންގެ ލީގުގެ ރައީސާއި ޒުވާނުންގެ ލީގުގެ ރައީސްގެ މަގާމު ވެސް ހިމެނެއެވެ.
އެންމެ ވާދަވެރިކަން ބޮޑީ ޖޭޕީގެ ނައިބު ލީޑަރުގެ މަގާމަށެވެ. ޖޭޕީގެ ނައިބު ލީޑަރުކަމަށް ކުރިމަތިލުމަށް ހުޅުވާލި ފުރުޞަތުގައި އެ މަޤާމަށް ކުރިމަތިލެއްވީ، ޓުރިޒަމް މިނިސްޓަރުގެ ކުރީގެ ނައިބު އަސްޢަދު ރިޒާއާއި، ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެންބަރު އަޙްމަދު ނިހާން ޙުސައިން މަނިކާއި، ޓްރާންސްޕޯޓް މިނިސްޓްރީގެ ކުރީގެ ސްޓޭޓް މިނިސްޓަރު އަދި ޖުމްހޫރީ ޕާޓީގެ އިސް ތަރުޖަމާން ޢަލީ ޞާލިޙްގެ އިތުރުން އެޕާޓީގެ ކައުންސިލް މެންބަރު މުޙައްމަދު ސަޢީދެވެ.
