މިދިޔަ ހޮނިހިރު ދުވަހު އިޒްރޭލުގެ އަނިޔާވެރި ދައުލަތާ ދެކޮޅަށް ފަލަޞްޠީނުގެ ހަމާސް ޖަމާޢަތުން ފެށި ވަރުގަދަ ޖިހާދު "އޮޕަރޭޝަން އަލް ޤުތުސް ތޫފާން" އަކީ މުސްލިމުންނާއި ޢަރަބީންގެ ކަރާމަތާއި ޝަރަފަށް ޓަކައި ފެށި ޚުތޫރަތްތެރި އާ މަރުޙަލާއެއް ކަމަށް ކުރީގެ ރައީސް އަލްއުސްތާޛް މައުމޫނު ޢަބްދުލް ޤައްޔޫމް ވިދާޅުވެއްޖެއެވެ.
ފަލަސްތީނުގެ ރައްޔިތުންގެ ޙައްޤުތައް ހޯދުމަށާއި، އިޒްރޭލުގެ އަނިޔާވެރިކަން ދުނިޔޭގެ ސަމާލުކަމަށް ގެނައުމަށް ހަމާސްގެ މުޖާހިދުން ފެށި ވަރުގަދަ ޖިހާދަށް ރައްދުދިނުމުގެ ގޮތުން، އިޒްރޭލުގެ އަނިޔާވެރި އަސްކަރިއްޔާއިން ވަނީ، ހަނގުރާމަ ޢިއުލާނުކޮށް، ޙަމާސްގެ މުޖާހިދުންނަށް ޙަމަލާ ދިނުމުގެ ނަމުގައި، ފަލަސްތީނުގެ ޢާންމު ރައްޔިތުންގެ ގެތަކާއި، ސްކޫލްތަކާއި ސިއްޙީ ޚިދުމަތްދޭ ތަންތަނަށް އަމާޒުކޮށް ކަނޑާއި އެއްގަމާއި ވައިގެ މަގުން ވަރުގަދަ ހަމަލާތަކެއްދޭންފަށައިފައެވެ. އަދި ދުނިޔޭގެ ޤާނޫނުތަކަށް ގޮންޖަހާލައި އިޒްރޭލުން ވަނީ، އެމީހުންގެ ކޮންޓްރޯލް އޮންނަ ހުރިހާ ދިމާއަކުން، ފަލަސްތީނަށް ކާބޯތަކެއްޗާއި ބޭސްފަރުވާއާއި އިންސާނީ އެހީތައް އެތެރެކުރެވޭނޭ މަގުތައް ބަންދުކޮށް، ފެނާއި ކަރަންޓުވެސް ކަނޑާލައިފައެވެ.
ފަލަސްތީނުގެ މުޖާހިދުންގެ ޖިހާދަށް ތާޢީދުކޮށް، އިސްލާމީ ގިނަ ޤައުމުތަކެއްގެ ވެރީން އެކަން ހާމަކުރަމުން ދާ މި ދަނޑިވަޅުގައި، ރާއްޖޭގެ ކުރީގެ ރައީސް މައުމޫނު ކުރެއްވި އެކްސް ޕޯސްޓެއްގައި ވިދާޅުވީ، "މިދިޔަ ހޮނިހިރު ދުވަހު ފަލަޞްޠީނުގެ ހިތްވަރުގަދަ މުޖާހިދުން ފެށި ޖިހާދުގެ އާ މަރުޙަލާ އަކީ މުސްލިމުންނާއި ޢަރަބީންގެ ކަރާމަތާއި ޝަރަފަށް ޓަކާ ފެށި ޚުތޫރަތްތެރި އާ މަރުޙަލާއެއް" ކަމަށެވެ. އަދި އެމަނިކުފާނު ވަނީ، "މާތް ﷲ ނަޞްރާއި ކާމިޔާބީ ދެއްވާށި!" އޭ ވިދާޅުވެ، ފަލަސްޠީނުގެ މުޖާހިދުންނަށް ނަސްރުދެއްވުން އެދި ދުޢާކުރައްވައިފައެވެ.
އިޒްރޭލްގެ ވަރުގަދަ ބޮމުގެ ޙަމަލާތަކުގައި ޣައްޒާގެ އެތަކެއް ޢިމާރާތްތަކެއް ބިމާ ހަމަކޮށްލާފައި ވާއިރު، މިހާތަނަށް މި ހަނގުރާމައިގައި ފަލަސްތީނުގެ 770އަށް ވުރެ ގިނަ މީހުން ވަނީ ޝަހީދުވެފައެވެ. އަދި ޒަޚަމްވި މީހުންގެ ޢަދަދު 4,000އަށްވުރެ ގިނައެވެ. އިޒްރޭލުގެ ވައިގެ ހަމަލާތަކުގައި ޝަހީދުވި މީހުންގެ ތެރޭގައި، 140 ކުޑަކުދީންނާއި 120 އަންހެނުން ހިމެނޭކަމަށް ފަލަސްތީނުގެ ހެލްތު މިނިސްޓްރީއާ ހަވާލާދީ ރިޕޯޓުތައް ބުނެއެވެ.
