ކުރީގެ ރައީސް އަބްދުﷲ ޔާމީނުގެ ސަރުކާރުގައި، އަދި މުޅި ރާއްޖޭގައި ވެސް މިހާތަނަށް އެންމެ ކާމިޔާބުކަމާއެކު ހިންގާފައިވާ އެންމެ ބިޔަ އެއް މަޝްރޫޢުކަމަށްވާ، ޗައިނާ މޯލްޑިވްސް ފްރެންޑްޝިޕް ބްރިޖް، ނުވަތަ "ސިނަމާލެ ބްރިޖް" ބޭނުންކުރާ ރައްޔިތުންގެ އަތުން ޑރ. މުޢިއްޒުގެ ވެރިކަމެއްގައި ފީނާގާން ނިންމާފައިވާ ކަމަށް ބުނެ ފަތުރަނީ ކަނޑައެޅިގެން ދިގު ޚަބަރެއް ކަމަށް އޭނާ ވިދާޅުވެއްޖެއެވެ.
ޕްރޮގްރެސް ކޯލިޝަންގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ވިދާޅުވީ، " އަޅުގަނޑުމެންގެ ވެރިކަމެއްގައި ސިނަމާލެ ބްރިޖު ބޭނުންކުރާ ރައްޔިތުން އަތުން ފީ ނަގަން ނިންމާފައިވާ ކަމަށް ފަތުރަމުންދަނީ ކަނޑައެޅިގެން ދޮގު ޚަބަރެއް،" ކަމަށެވެ.
އަދި "ދޮގު ބުހުތާނު ވާހަކަތައް ފެތުރުމަކީ ޒިންމާދާރުކަން ކުޑަ، ނާތަހުޒީބު ޢަމަލެއް." ކަމަށް ވެސް އޭނާ ވިދާޅުވިއެވެ.
ރައީސް ޔާމީނުގެ ސަރުކާރުން އެޅި ސިނަމާލެ ބްރިޖަކީ، ޑރ. މުޢިއްޒުގެ ހައުސިންގ މިނިސްޓަރު ކަމުގައި ކުރިއަށް ގެންދިޔަ މަޝްރޫޢެކެވެ. އޭރު ހަމަޖައްސާފައި އޮތީ، ބްރިޖް ހުޅުވުމަށް ފަހު ވަކި މުއްދަތެއްގެ ތެރޭގައި ބްރިޖު ބޭނުންކުރާ ފަރާތްތަކުން ޓޮލްއެއް ދައްކާގޮތަށް ހަމަޖެއްސުމަށެވެ. އަދި ޒަމާނީ އެންމެ ފަހުގެ ވަސީލަތްތަކާއެކު ޓޮލް ނެގޭނޭގޮތް ހަމަޖައްސަވާނޭކަމަށް އޭރު މުޢިއްޒު ވިދާޅުވެފައިވެއެވެ.
ނަމަވެސް، 2018 ވަނަ އަހަރު ސަރުކާރު ބަދަލުވުމާއެކު ބްރިޖްގެ މެއިން އެންޓްރެންސްގެ ލައިޓްތައްވެސް ނިއްވާލައި، ނަމްބޯޑުވެސް ނުދިއްލައި، އެތަނުން ނަގާންޖެހޭ އެއްވެސް ފީއެއް ނުނަގާން ރައީސް އިބްރާހީމް މުޙައްމަދު ޞާލިޙުގެ ސަރުކާރުން ނިންމިއެވެ.
ޙަގީގަތަކީ، މިފަދަ މަޝްރޫޢުތައް ދުނިޔޭގެ އެންމެ މުއްސަނދި ގައުމުތަކުގައި ވެސް ހިންގަނީ އެތަންތަން މަރާމާތުކުރުމަށް ބޭނުންވާ ފައިސާ އެތަންތަނުން ލިބޭގޮތަށެވެ. ނަމަވެސް ސަރުކާރުން ވަނީ، މިކަމަށްވެސް އިހުމާލުވެ އެ ފީ ނުނަގައި ދައުލަތަށް މިލިއަނުން ގެއްލުން ލިބޭގޮތަށް އެކަންވެސް ކޮށްފައެވެ.
