ދިވެހީންނަށް ހިލޭ ބޭސްކުރެވޭނޭގޮތް ހެދުމަށް ސަރުކާރުން ގާއިމްކޮށްފައިވާ، އާސަންދަ ނިޒާމުން ޚިދުމަތް ލިބިގަތުމަށް ރައްޔިތުން ސަލާންޖަހަން ޖެހޭ ސަގާފަތެއް ރައީސް އިބްރާހީމް މުޙައްމަދު ޞާލިހުގެ ސަރުކާރުން އަށަގަންނުވައިފި ކަމަށާއި، އެކަން ބަދަލުކޮށް، އާސަންދަ ނިޒާމަކީ ފެންވަރު ރަނގަޅު އިންޝުއަރެންސް ނިޒާމަކަށް ބަދަލުކޮށްދެއްވާނޭ ކަމަށް ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބު (އިއްލި) ވިދާޅުވެއްޖެއެވެ.
ރިޔާސީ ކެމްޕޭނަށް ނ. އަތޮޅަށް ކުރައްވާ ދަތުރުފުޅުގައި އެއަތޮޅު މަނަދޫ ރައްޔިތުންނާ ބައްދަލަކުރައްވައި އިލްޔާސް ވިދާޅުވީ، ކުރީގެ ރައީސް މުޙައްމަދު ނަޝީދު ވެރިކަމަށް ވަޑައިގެން، ރާއްޖޭގައި އޭރުއޮތް ބޭސްފަރުވާއަށް ސަލާންޖެހުމުގެ ސަގާފަތް ނައްތާލެއްވިކަމަށެވެ. ނަމަވެސް ރައީސް އިބްރާހީމްގެ ސަރުކާރުން އެ އަނެއްކާވެސް ބޭސްފަރުވާއަށް ސަލާންޖަހަން ރައްޔިތުންނަށް މަޖުބޫރުކުރުވައިފި ކަމަށެވެ.
"މިއަދު އާސަންދަ ތަޢާރަފްކޮށްފައިވާއިރު މިޖެހެނީ އާސަންދައަށް ސަލާންޖަހަން. ތިއިން އެއްވެސް ބޭފުޅަކަށް އާސަންދައެއް ނުލިބޭނެ މިތާއިންނަ ސިޔާސީ ކޮންމެވެސް ބޭފުޅަކަށް ނުގުޅައެއް. ދެތިން ހަތަރު ފަހަރު ފޯނުކޮށްގެން އައިޑީކާޑް ވަޓްސްއެޕްކޮށްގެން ވައިބަރކޮށްގެން އޭނާ ފޯނުނުނަގައިގެން އެތައްބަޔަކަށް ގުޅައިގެން ނޫންގޮތަކަށް ތިއިން ބޭފުޅަކަށް އާސަންދައެއް ހަމައެއް ނުޖެހޭނެ،" ޑިމޮކްރެޓްސްގެ ޒުވާން ރިޔާސީ ކެންޑިޑޭޓް ވިދާޅުވިއެވެ.
އިލްޔާސް ވިދާޅުވީ، "އާސަންދައަށް އަނެއްކާވެސް ސަލާންޖެހުމުގެ ސަގާފަތެއް މިސަރުކާރުން އެކަށައެޅި. އަޅުގަނޑު މިއަންނަނީ އާސަންދަ ނިޒާމް އިންޝުއަރެންސް ނިޒާމަކަށް ބަދަލުކޮށް، ތިއިން ބޭފުޅަކު ބަލިވީމަ އެ ބޭފުޅަކު ބޭނުންފުޅުވާ ޑޮކްޓަރަކަށް، ބޭނުންވާ ހޮސްޕިޓަލަކަށް ގޮސް ބޭނުންވާ ފަރުވާއެއް ހޯދުމުގެ އިޚްތިޔާރު ތިބޭފުޅުންނަށް ލިބޭނޭ ގޮތަކަށް އެނިޒާމް ބައްޓަންކުރާން،" ކަމަށެވެ.
އަދި "އެއްވެސް ސިޔާސީ ބޭފުޅަކަށް ނުގުޅައި، އެސްވެސް މަޖިލިސް މެންބަރަކަށް ނުގުޅައި، އެސްވެސް އިތުރު މީހަކަށް ނުގުޅައި ސީދާ ތިބޭފުޅުން ދިޔައިމަ އާސަންދަ ލިބޭނޭ އިންތިޒާމް ހަމަޖައްސަން، އިރާދަކުރެއްވިއްޔާ އަޅުގަނޑުމެން އެބަދަކު ގެންނާނަން،" ކަމަށްވެސް އޭނާ ވިދާޅުވިއެވެ.
ރަނިންގމޭޓެއްގެ ގޮތުގައި އެސްޓީއޯގެ ކުރީގެ މެނޭޖިންގ ޑިރެކްޓަރު ޙުސައިން ޢަމްރޫ މުޙައްމަދު ރަޝާދާއެކު އިންތިޚާބުގައި ވާދަކުރައްވާ އިލްޔާސް ވިދާޅުވީ، މި ސަރުކާރުން ނ. އަތޮޅުގައިވެސް 4 ހޮސްޕިޓަލް އަޅާން ރައީސް އިބްރާހީމް ވައުދުވެވަޑައިގެންފި ކަމަށާއި، ދައުލަތުގެ ފައިސާ ޚަރަދުކޮށްގެން ހަތަރު ފާރުރާނައި އިމާރާތްތަކެއް އެޅިޔަސް އެތަނުގައި ވަސީލަތެއް ނެތި އަދި ޚިދުމަތް ހޯދާނޭ ބަޔަކުވެސް ނެތި، އޭގެ މަންފާ ނުކުރާނޭ ކަމަށާއި، ޑިމޮކްރެޓްސްގެ ސަރުކާރެއްގައި، ނ. އަތޮޅު ހޮސްޕިޓަލްގައި އެންމެ ޒަމާނީ ވަސީލަތްތަކާއެކު ފެންވަރު ރަނގަޅު ޑޮކްޓަރުން ގެނެސް، ސަރަހައްދުގެ ހުރިހާ ރައްޔިތުންނަށް ފެންވަރު ރަނގަޅު ސިއްހީ ޚިދުމަތް ފޯރުކޮށްދޭ ތަނަކަށް އެ ހޮސްޕިޓަލް ބަދަލުކޮށްލައްވާނޭ ކަމަށެވެ.
