ބޮޑު ތިލަންދުމަތީގެ ޓޫރިޒަމް ކުރިއަރުވަން އޭނާގެ ވެރިކަމެއްގައި ޓޫރިޒަމް ވިޔަފާރިތަކަށް 10 އަހަރުގެ މުއްދަތަކަށް ޓެކްސް ލުއިކޮށްދޭނެ ކަމަށް ދަ ޑިމޮކްރެޓްސްގެ ރިޔާސީ ކެންޑިޑޭޓޫ އިލްޔާސް ލަބީބު (އިއްލި) މިއަދު ވިދާޅުވެއްޖެއެވެ.
އަންނަ ސެޕްޓޭމްބަރު 9 ވަނަ ދުވަހު އޮންނަ ރިޔާސީ އިންތިހާބުގެ ކެމްޕެއިނަށް މިއަދު ހެނދުނު ހދ. ނޮޅިވަރަމްގައި ޑިމޮކްރެޓްސްއިން ބޭއްވި ބައްދަލުވުމުގައި އިލްޔާސް ވިދާޅުވީ، ހދ. ހަނިމާދޫ އެއާޕޯޓު ތަރައްގީކޮށް ނިމުމުން އެކަމާ ގުޅިގެން އެ ސަރަހައްދުގެ ޓޫރިޒަމް ކުރިއަރައިގެންދާނެ ކަމަށެވެ.
އިލްޔާސް ވިދާޅުވީ، އެ ސަރަހައްދަށް ޓޫރިޒަމް އިންވެސްޓްމެންޓް ގެނައުމަށްޓަކައި އިންވެސްޓަރުންނަށް ޓެކްސްގެ ލުއިތަކެއް ދެއްވާނެ ކަމަށެވެ.
އެގޮތުން، އޭނާގެ ސަރުކާރެއްގައި ފުރަތަމަ ތިން އަހަރު ޓީޖީއެސްޓީ އެއްވެސް ވަރަަކަށް އެ ވިޔަފާރިތަކުން ނުނަގާނެ ކަމަށް ވިދާޅުވިއެވެ. އަދި ބާކީ ހަތް އަހަރު އެ ސަރަހައްދުގެ ޓޫރިޒަމް ވިޔަފާރިތަކަށް ޓީޖީއެސްޓީ 50 ޕަސެންޓު ކުޑަކޮށްދެއްވާނެ ކަމަށް ވިދާޅުވިއެވެ.
"އިންވެސްޓް ކުރަން ތިބި ފަރާތްތަކަށް ޓީޖީއެސްޓީ ފުރަތަމަ ތިން އަހަރު އަޅުގަނޑުމެން ޒީރޯ ޕަސެެންޓަށް ކުޑަކުރަނީ. ދެން ޖެހިގެން އަންނަ ހަތް އަހަރު 50 ޕަސެންޓަށް އަޅުގަނޑުމެން ކުޑަކުރަނީ،" އިލްޔާސް ވިދާޅުވިއެވެ.
އޭގެ އިތުރުން، އެ ސަރަހައްދުގެ ޓޫރިޒަމް މަސައްކަތް ކުރަން ބޭނުންވާ މީހުންނަށް އެކަމުގެ ފައިސާއާއި ވަސީލަތްތައް ހަމަޖައްސައިދޭނެ ކަމަށް ވެސް އިލްޔާސް ވިދާޅުވިއެވެ.
އަދި އެ ސަރަހައްދަށް ޓޫރިސްޓުން ގެނައުމަކީ ޝައްކެއް އޮތް ކަމެއް ނޫން ކަމަށް ވިދާޅުިވި އެވެ.
