ސެޕްޓެމްބަރ 9 ވަނަ ދުވަހު ބާއްވާ ރާއްޖޭގެ ރިޔާސީ އިންތިޚާބު އެއްބުރުން ކާމިޔާބުކުރައްވައި ދެވަނަ ދައުރެއް ހޯއްދެވުމަށް ރާއްޖޭގެ ހުރިހާ ރަށަކަށް ދަތުރުފުޅު ފައްޓަވައިގެން އުޅުއްވަނިކޮށް، އާލާސްކަންފުޅު ބޮޑުވެ، ރައީސް އިބްރާހީމް މުޙައްމަދު ޞާލިހުގެ ކެމްޕޭން ދަތުރުފުޅުތައް ވަގުތީގޮތުން މެދުކަނޑާލައިފިއެވެ.
ރައީސްގެ ކެމްޕޭން ތަރުޖަމާނު އަދި އަދި ދިފާޢީ ވަޒީރު މާރިޔާ އަޙްމަދު ދީދީ ވިދާޅުވީ، އއ. އަތޮޅުގެ 7 ރަށަކަށް ވަޑައިގަތުމަށް ފަހު މިއަދު އެއަތޮޅު ހިމަންދޫއަށް ދަތުރުފުޅުކުރައްވާން އޮތް ނަމަވެސް އާލާސްކަންފުޅާއެކު ދަތުރުފުޅުތައް ރައީސް މިވަގުތަށް މެދުކަނޑުއްވާލައްވާފައި ވާ ކަމަށެވެ. ކުރިއަށް އޮތީ އދ. އަތޮޅުގެ ރައްތަކަށް ކުރައްވާ ދަތުރުފުޅެވެ.
މާރިޔާ ވިދާޅުވީ، ރާއްޖޭގެ ހުރިހާ ރަށަކަށް ރައީސް ވަޑައިގަތުމަކީ އަމާޒެއް ކަމަށާއި، "އެކަމަކު މިކަހަލަ ކަމެއް ދިމާވެގެން އެހެން ހުއްޓުން އެރުން ފިޔަވައި ހަމަ ގައިމުވެސް ރައީސް ހުރިހާ ރަށަކަށް ދަތުރުފުޅު ކުރެއްވޭތޯ މަސައްކަތް ކުރައްވާނެ،" ކަމަށެވެ.
ކެމްޕޭނު ދަތުރުފުޅުތަކުގައި މިހާރުވެސް ރައީސް އިބްރާހީމް ވަނީ، ރާއްޖޭގެ އުތުރަށާއި މެދުތެރެއަށާއި އަދި ދެކުނުގެ ބައެއް ރައްތަކަށް ވަޑައިގެންފައެވެ. އަދި އެ ދަތުރުފުޅުތަކުގައި ސަރުކާރުން ރަށްތަކުގައި ހިންގާފައިވާ ފުޓްސަލް ދަނޑުއެޅުމާއި، މަލްޓިޕަރޕޯސް ހޯލުއެޅުން ފަދަ ބޮޑެތި މަޝްރޫޢުތައް އިފްތިތާހުކޮށްދެއްވާފައިވެއެވެ. މީގެ އިތުރުން ބަނދަރު ހެދުމާއި ފެނާއި ނަރުދަމާގެ ނިޒާމްތައްވެސް މިދުވަސްވަރު ގިނަ ރައްރަށުގައި ދަނީ އިފްތިތާހުކުރެވެމުންނެވެ.
ބައެއް ރައްތަކުން ރައީސަށް ވަރަށް ބޮޑަށް ތާޢީދު ފެނިގެންދާއިރު، ބައެއް ރައްތަކަށް އަރާވަޑައިގަންނަވާން ޖެހެނީ ފުލުހުންނާއި ސަލާމަތީ ބާރުތަކުން ނުކުމެ ރައްޔިތުންގެ އަޑު ކަނޑުވާލައިގެންކަންވެސް ފާހަގަކޮށްލާން ޖެހެއެވެ.
