ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފާއި މުޅި ކުޅުދުއްފުށީ ކައުންސިލް ދަ ޑިމޮކްރެޓްސް ދޫކޮށް އެނބުރި އެމްޑީޕީއަށް ސޮއިކޮށްފިއެވެ.
އެމްޑީޕީ ތެރެއިން އުފެދުނު، ރައީސް މުހައްމަދު ނަޝީދަށް ތާއީދު ކުރާ "ފިކުރެއްގެ ދިރުން" ފެކްޝަންގެ 13 މެމްބަރަކު އެ ޕާޓީން ވަކިވެ، ދަ ޑިމޮކްރެޓްސް އުފެއްދުމުގެ މަސައްކަތް ފެށި އިރު އެ މެމްބަރުންގެ ތެރޭގައި ވެސް ހިމެނުނު ޔާސިރު އެނބުރި އެމްޑީޕީއަށް ގުޅިވަޑައިގެންނެވި ސަބަބެއް އަދި ހާމައެއް ނުކުރައްވައެވެ.
ކުޅުދުއްފުށީ ކައުންސިލް އެއްކޮށް، ދަ ޑިމޮކްރެޓްސް އަށް ބަދަލުވީ މެއި 30 ވަނަ ދުވަހު އެވެ.
މޭޔަރު މުހައްމަދު އާތިފް އޭރު ވިދާޅުވީ، އެމްޑީޕީން ވަކިވާން ޖެހުނީ ރައްޔިތުން ހަވާލު ކުރި މަސައްކަތް ސަރުކާރުން ނުކުރާތީ ކަމަށެވެ.
ކައުންސިލުގެ މެމްބަރުން ވެސް އަލުން އެމްޑީޕީއާ ގުޅިފައިވާއިރު، އެނގިފައިވާ ގޮތުގައި ރައީސް އިބްރާހީމް މުޙައްމަދު ޞާލިހު މިއަދު ވަނީ އެ ބޭފުޅުންނާ ބައްދަލުކުރައްވައިފައެވެ.
ކުޅުދުއްފުއްޓަކީ އެމްޑީޕީގެ މެޖޯރިޓީއެއް އޮންނަ ރަށެކެވެ. މިދިޔަ ލޯކަލް ކައުންސިލްތަކުގެ އިންތިހާބުގައި އެމްޑީޕީއަށް ހުރިހާ ގޮނޑިއެއް ލިބުނު ހަމައެކަނި ސިޓީއަކީވެސް ކުޅުދުއްފުއްޓެވެ.
