ސުޕްރީމް ކޯޓުގެ ހުކުމާ ގުޅިގެން، ކުރިއަށް އޮތް ރިޔާސީ އިންތިޚާބުގައި، ޕީޕީއެމްގެ ކެންޑިޑޭޓް ކުރީގެ ރައީސް އަބްދުﷲ ޔާމީނަށް ވާދަ ނުކުރެއްވޭނޭ ކަން ކަށަވަރުވުމާއެކު ޕީޕީއެމް ބޭނުން ނަމަ އިންތިޚާބު ބޮއިކޮޓްކުރުމަށް އިރުޝާދު ދެއްވުމަށްފަހު، ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒަށް ތާއީދުކުރައްވާކަން ޔާމީން ހާމަކުރައްވައިފިއެވެ.
ރައީސް ޔާމީނުގެ ގާނޫނީ ވަކީލު އަދި ޔާމީނުގެ މިފަހަރުގެވެސް ރަނިންގމޭޓަކަށް ހަމަޖެއްސެވި ކުރީގެ ނައިބު ރައީސް ޑރ. މުޙައްމަދު ޖަމީލު އަޙްމަދު ވިދާޅުވީ، "އެންމެ ރަނގަޅު ގޮތަކީ ކޯލިޝަންގެ ފަރާތުން ކެންޑިޑޭޓަކު ވާދަކުރުން،" ކަމަށާއި ޕީޕީއެމް/ޕީއެންސީ ސެނެޓްގެ ވިސްނުމާ އެއްގޮތަށް "ޔާމީން ވަނީ އެ މަނިކުފާނުގެ ވިސްނުންފުޅު ބަދަލުކުރައްވާފައި،" ކަމަށެވެ.
ޔާމީންގެ ކެންޑިޑަސީ ބަލައި ނުގަތުމާ ގުޅޭގޮތުން އިލެކްޝަންސް ކޮމިޝަނުން ނިންމި ނިންމުމަށް ސުޕްރީމް ކޯޓުން ތާޢީދުކުރުމުން އިންތިޚާބު ބޮއިކޮޓްކުރާން ޔާމީން މަސައްކަތްކުރެއްވި ނަމަވެސް، އެ ޕާޓީގެ ތެރޭގައި އެކަމާ ގުޅޭ ހޫނު ބަހުސުތަކަކަށް ފަހު، ސެނެޓްގެ ވޯޓުން ނިންމީ، ޔާމީން ސަލާމަތްކުރެވޭނީވެސް އެ ކޯލިޝަންގެ ކެންޑިޑޭޓަކު ނެރެ އިންތިޚާބު ކާމިޔާބުކޮށްގެން ކަމަށެވެ. އެގޮތުން ސެނެޓް ބައްދަލުވުމުގައި ބައިވެރިވި 126 ސެނެޓަރުންގެ ތެރޭން 67 ސެނެޓަރުން ވަނީ އިންތިޚާބުގައި ވާދަކުރާން ނިންމައިފައެވެ.
