ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަޙްމަދު ސިޔާމް މުޙައްމަދު ސިންގަޕޫރަށް ވަޑައިގަތުމުން އޭނާ ފުރުން މަނާކޮށް ޕާސްޕޯޓް ހިފެއްޓިވާހަކައަކީ، ވަކި ބަޔަކު މީޑިއާގެ އަޑީގައި ތިބެގެން ފެތުރި ދޮގުވާހަކަތަކެއް ކަމަށް އޭނާ ވިދާޅުވެއްޖެއެވެ.
ހުކުރުދުވަހުގެ ރޭ، ސިންގަޕޫރުން އެނބުރި ވަޑައިގެން ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނާ ވާހަކަދައްކަވަމުން، ފުރުން މަނާކުރި ތޯ ސުވާލުކުރުމުން ސަން ކުންފުނީގެ ވެރިޔާ ވިދާޅުވީ، "އަޅުގަނޑަށް އެނގޭ ކަމެއް ވެސް ނޫން ތީކީ. އަޅުގަނޑަށް ތި ހަބަރު ލިބުނީ ހަމަ މީޑިއާތަކުގެ ހެޑްލައިނުން،" ކަމަށެވެ.
އޭނާވަނީ، އެ ވާހަކަތައް ފަތުރާފައި ވަނީ، އަލަށް އުފެއްދި ސިޔާސީ ޕާޓީ، ދަ ޑިމޮކްރެޓްސްގެ ލީޑަރުންގެ ކަމަށް ފާހަގަކުރެއްވިފައިވާ ކަމަށެވެ.
ރައީސް އިބްރާހީމް މުޙައްމަދު ޞާލިޙު ދެވަނަ ދައުރަކަށް ހޮވާން ސަރުކާރާ އިއްތިހާދުވެފައިވާ އެމްޑީއޭގެ ލީޑަރު ސިންގަޕޫރަށް ވަޑައިގަތުމުން އޭނާ އެގައުމުން ފުރުން މަނާކޮށް ފާސްޕޯޓް ހިފަހައްޓައިފައިވާ ކަމަށް ރިޕޯޓުކޮށްފައިވަނީ މިދިޔަ ހޯމަދުވަހުއެވެ.
ސިޔާމްގެ މައްސަލައިގައި ދިވެހި ސަރުކާރުން ސިންގަޕޫރު ސަރުކާރަށް ސިޓީތަކެއްވެސް ފޮނުވާފައިވެއެވެ.
ނ. އަތޮޅުގައި ސަން ސިޔާމް ގްރޫޕުން ތަރައްގީކޮށް ހިންގާ އިރުފުށި ރިސޯޓް ހިލްޓަންއަށް ދިން އެއްބަސްވުން 2013ގައި ބާތިލުކުރުމުގެ ސަބަބުން، ހިލްޓަންއިން އެމައްސަލަ ސިންގަޕޫރުގެ އާބިޓްރޭޝަނަށް ހުށަހެޅުމުން، އާބިޓްރޭޝަނުން މައްސަލަ ބަލައި، ހިލްޓަނަށްއަށް 24 މިލިއަން ޑޮލަރު ދިނުމަށް ސަންގެ މައްޗަށް އަމުރު ކުރިއެވެ. ނަމަވެސް އެ އަމުރާ އެއްގޮތަށް އަމަލު ނުކުރާތީ ހިލްޓަންއިން އެ މައްސަލަ ސިންގަޕޫރޫގެ ހައިކޯޓަށް ހުށަހެޅީއެވެ.
