ވޭތުވެ ދިޔަ ފަސް އަހަރުގެ ތެރޭގައި ރާއްޖޭގެ އިގްތިސާދު ހަރުދަނާކުރާން ސަރުކާރުން އެޅި ބައެއް ފިޔަވަޅުތަކާ ގުޅިގެން ތަކެތީގެ އަގު ބޮޑުވާނޭކަމަށް ބުނެ، އިދިކޮޅުފަރާތްތަކުން ދައްކަނީ ހަގީގަތާ ޚިލާފު ވާހަކަތަކެއް ކަމަށާއި، ފެންނާން އޮތީ މުޅިން ތަފާތު މަންޒަރެއްކަމަށް ރައީސް އިބްރާޙީމް މުޙައްމަދު ޞާލިޙު ވިދާޅުވެއްޖެއެވެ.
ދެވަނަ ދައުރެއް ހޯއްދެވުމަށް "އުފާވެރި އަމާންރާއްޖެ" ޝިޢާރުގެ ދަށުން ކުރިއަށް ގެންދަވާ ކެމްޕޭން ހަރަކާތްތަކުގެ ތެރޭން، މުލަކުއަތޮޅަށް ވަޑައިގެން މުލީގައި ދެއްކެވި ވާހަކަފުޅުގައި ރައީސް އިބްރާހީމް ވަނީ އިދިކޮޅު ފަރާތްތަކަށް ވަރަށް ބޮޑަށް ބަހުގެ ހަމަލާތައް ދެއްވައިފައެވެ. އެގޮތުން އެމަނިކުފާނު ވިދާޅުވީ، ކޮވިޑް19އާއި ޔޫކްރޭން ހަނގުރާމައިގެ ސަބަބުން ބައެއް ގައުމުތަކުގެ އިގްތިޞާދު އަޑިއަޅައިލި ނަމަވެސް، އެމަނިކުފާނުގެ ސަރުކާރުން އެޅި ހިކުމަތްތެރި ފިޔަވަޅުތަކުގެ ނަތީޖާއަކީ ރާއްޖޭގެ އިގްތިޞާދު އަޑިއަޅާނުލައި އޮތުން ކަމަށެވެ.
އެގޮތުން، ރައްޔިތުންނަށް ހެޔޮއަގުގައި ތަކެތި ފޯރުކޮށްދޭން ބަޖެޓަށް ވުރެ އިތުރަށް ކޮންމެ މަހަކުވެސް ހޭދަކޮށްފައި ވާކަމަށާއި، އެތަކުލީފު ރައްޔިތުންނަށް ނުޖެއްސައި، ސަރުކާރުން އެޅި ފިޔަވަޅުތަކުގެ ސަބަބުން ކުރިއަށް އޮތް ފަސް އަހަރު ތެރޭގައި ރާއްޖޭގެ އިގްތިޞާދު ދެގުނަވާނޭކަމަށް އިބްރާހީމް ވިދާޅުވިއެވެ.
ރައީސް ވިދާޅުވީ، އޮޅުވާލަން ކިތަންމެ ވާހަކައެއްވެސް ދެއްކިދާނޭ ކަމަށާއި، ނަމަވެސް ރޭވުންތެރިކަމާއެކު ޕްލޭނެއް އޮވެގެން ކަންކަން ކުރުމުގެ ނަތީޖާއަކަށް އެމަނިކުފާނަށް ފެންނަނީ 2018ން 2028އަށް ރާއްޖޭގެ އިގްތިޞާދު ދެގުނަވެ، އާމްދަނީ ދެގުނަވާތަން ކަމަށެވެ.
"ކިތަންމެ ބާރަށް ތަކެތީގެ އަގު ބޮޑު ވެޔޭ ބުންޏަސް، އެމްއެމްއޭއިން، ސެންޓްރަލް ބޭންކުން އެ ބުނަނީ ތަކެތީގެ އަގު ދަނީ ދަށަށޭ،" ވަރަށް ފޯރީގައި ވާހަކަދައްކަވަމުން ރައީސް ވިދާޅުވިއެވެ.
ރައީސް އެހެން ވިދާޅުވި ނަމަވެސް، އާންމު ރައްޔިތުންނަށް ބާޒާރުން، ގިނަ ބާވަތްތަކުގެ މުދާ ގަންނާން ލިބެނީ، ވަރަށް ބޮޑު އަގުގައެވެ. އެގޮތުން، މީގެ ދެއަހަރެއްހާ ދުވަހާ އަޅައިކިޔާއިރުވެސް ގިނަ ތަކެތީގެ އަގު ހުރީ ދެގުނަ، ނުވަތަ އެއަށްވުރެވެސް ބޮޑަށް އުފުލިފައެވެ.
