ރިޔާސީ އިންތިޚާބާ ދިމާކޮށް ރައްޔިތުންގެ ތާޢީދު ހޯއްދެވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު މުލަކުއަތޮޅަށް ކުރައްވަމުން ގެންދަވާ ދަތުރުފުޅުގެ ތެރޭން އެއަތޮޅު މުއްޔާއި ނާލާފުށީގައި ނިމިފައި ހުރި ބައެއް މަޝްރޫޢުތައް އިފްތިތާހުކުރައްވައިފިއެވެ.
ރައީސްގެ މި ދަތުރުފުޅުގައި އެމަނިކުފާނު ވަނީ، ނާލާފުށީ އިންޖީނުގެއާ ފެނަކަ އޮފީސް އިމާރާތް ހުޅުއްވައިދެއްވައިފައެވެ. ފެނަކަ އޮފީސް ޢިމާރާތަކީ 15 މުވައްޒަފުންގެ ޖާގައިގެ ތަނެކެވެ. އަދި އާ އިންޖީނުގޭގެ ކެޕޭސިޓީ އަކީ، 538 ކިލޯވޮޓްއެވެ.
ރައީސް އިބްރާޙީމްގެ މި ދަތުރުފުޅުގެ ތެރޭން މ. މުއްޔަށް ވަޑައިގެން އެރަށު ފެނުގެ ނިޒާމް ޤާއިމްކުރުމުގެ މަޝްރޫޢު ނިމުން ފާހަގަކުރުމުގެ ގޮތުން ބޭއްވި ރަސްމިއްޔާތުގައި ބައިވެރިވެވަޑައިގަތެވެ. މި މަޝްރޫޢަކީ އެސް.އެމް.ސީ އިންފްރާސްޓްރަކްޗަރ ޕްރައިވެޓް ލިމިޓެޑާއި ހަވާލުކޮށްގެން، އިންޑިއަން އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން، ކުރިޔަށް ގެންދެވުނު މަޝްރޫޢުކެވެ.
ރިޔާސީ އިންތިޚާބަށް ދެމަހެއްހާ ދުވަހަށް ވެފައިވާއިރު، ސަރުކާރުން ދަނީ، އަތޮޅުތެރޭގައި ވޭތުވެދިޔަ ފަސް އަހަރު ތެރޭގައި ކުރިއަށް ގެންދިޔަ މަޝްރޫޢުތައް ނިންމައި، ރައީސްގެ ދަތުރުފުޅުތަކާ ދިމާކޮށް އެތަންތަން ހުޅުވުމަށް ގިނަ މަސައްކަތްތަކެއް ކުރަމުންނެވެ.
