ވެރިކަން ކުރާ ކޯލިޝަންގެ މައި ޕާޓީ، އެމްޑީޕީގެ ސްލޮޓެއްގައި، ހެރިޓޭޖް މިނިސްޓްރީގެ ޕޮލިޓިކަލް ޑިރެކްޓަރަކަށް ހުންނެވި ޝަމްޢޫނު ޖަލީލު (ލޫކަސް) އެމަގާމުން އިސްތިއުފާދެއްވައިފިއެވެ.
ރައީސް އިބްރާހީމް މުޙައްމަދު ޞާލިޙު ވެރިކަމަށް ގެނައުމަށް ސޯޝަލް މީޑިއާގައާއި އެމްޑީޕީގެ މަގުމަތީ ހަރަކާތްތަކުގައިވެސް ވަރަށް ގަދައަށް ފެނިގެންދިޔަ ލޫކަސް، ސަރުކާރުން އިސްތިއުފާދެއްވާފައި މިވަނީ، މީގެ ދުވަސްކޮޅެއް ކުރީން އޭނާ ނިސްބަތްވާ ބ. ކުޑަރިކިލުގައި، ޕީޕީއެމް/ޕީއެންސީ ހިންގުމާއި މިވަގުތު ހަވާލުވެ ހުންނެވި ޢަބްދުއްރަހީމް އަބްދުﷲ (އަދުރޭ)އާއި މާލޭ ޑެޕިއުޓީ މޭޔަރު އަހްމަދު ނަރީޝްއާ އެކު ނަންގަވާފައިވާ ފޮޓޯއެއް ސޯޝަލް މީޑިއާގައި ދައުރުވާން ފެށުމުން އެކަމަށް ފާޑުކިޔައި، ސަރުކާރުގެ އިސްފަރާތްތަކަކުން އޭނާގެ އިސްތިއުފާއަށް ގޮވާލާފައިވަނިކޮށެވެ.
ސަރުކާރުން އިސްތިއުފާ ދެއްވުމަށް ފަހު ލޫކަސްވަނީ، އޭނާ ރައީސް އިބްރާހީމަށް ފޮނުއްވި ސިޓީ ޓްވިޓަރގައި ހިއްސާކުރައްވައިފައެވެ. އެގޮތުން އެސިޓީގައި ވަނީ، "އަޅުގަނޑު ސަރުކާރުގައި އަދާކުރަމުންދާ ސިޔާސީ މަގާމުން މިއަދު އިސްތިއުފާ ދީފިން. ސަރުކާރުގައި މަސައްކަތްކުރުމުގެ ފުރުސަތަކީ ތަޖްރިބާއެއް" ކަމަށެވެ.
މީގެއިތުރުން "އަބަދުވެސް ބަހައްޓަވާ ގާތްކަމަށް ރައީސުލްޖުމްހޫރިއްޔާއަށް ޝުކުރިއްޔާ" އެ ސިޓީ ނިންމާލައްވަމުން ލޫކަސް ވިދާޅުވިއެވެ.
ލޫކަސްގެ އިސްތިއުފާއާ ގުޅިގެން، ހެރިޓޭޖް މިނިސްޓަރ ޔުމްނާ މައުމޫން ވަނީ،" މިނިސްޓްރީގައި ހުންނަވައިގެން ދިވެހި ތާރީޚާއި ސަގާފަތާއި އާދަކާދައިގެ ދާއިރާއިން ލޫކަސް ކޮށްދެއްވި މަސައްކަތަށް ޝުކުރު ދަންނަވަން. ބާއްޖަވެރި ކުރިމަގަކަށް އެދެން." ކަމަށް ވިދާޅުވެ ޓްވީޓް ކުރައްވައިފައެވެ.
ޖަވާބުގައި " ޝުކުރިއްޔާ މިނިސްޓަރ ޔުމްނާ. އަބަދުވެސް ބަހައްޓަވާ އެކުވެރިކަމާ އެހީތެރިކަމަށް ވަރަށް ބޮޑަށް ޝުކުރިއްޔާ. މިނިސްޓަރ އާ ވުޒާރާއަށް އަބަދުވެސް ކާމިޔާބަށް އެދެން،" ކަމަށް ލޫކަސް ވިދާޅުވެފައިވެއެވެ.
ސޯޝަލް މީޑިއާގެ ހަރަކާތްތަކުގެ އިތުރުން، ލިޔުންތެރިކަމާއި ރާއްޖޭގެ ތާރީޚަށްވެސް ލޯބިކުރާ ލޫކަސްއަށް ސަރުކާރުން ވަޒީފާ ހަމަޖެހުނު ފަހުން އެކްޓިވިސްޓެއްގެ ގޮތުން މާބޮޑު ހަރަކާތްތަކެއް ނުފެނެއެވެ. އަދި ސަރުކާރު ޕްރޮޕޯޓްކުރުމުގައިވެސް އޭނާގެ މާބޮޑު ހިއްސާއެއް ނުފެނެއެވެ.
އަދުރޭއާ ނަރީޝްއާއެކު ލޫކަސް ނަންގަވާފައިވާ ފޮޓޯއާ ގުޅިގެން މި ސަރުކާރުގެ އިކޮނޮމިކް މިނިސްޓަރ އަދި އެމްޑީޕީގެ ޗެއަރޕަރސަން ފައްޔާޒު އިސްމާޢީލު ވިދާޅުވެފައި ވަނީ، "ސަރުކާރުގެ އެހެން މީހުން މި މީހުންނާއެކު، ފޮޓޯ ނެގިޔަސް ސަރުކާރު ޕްރޮމޯޓުކުރަން ނުކެރިފައި ނުތިބޭ. މިކަންވެސް ކޮށްފައި ސަރުކާރު ޕްރޮމޯޓުކޮށްލަން ކެރޭނަމަ ރަނގަޅު،" ކަމަށެވެ. އެނޫން ނަމަ އިސްތިއުފާ ދެއްވާހާ ހިތްވަރު ހުންނާން ޖެހޭކަމަށް ސަރުކާރުގެ އެންމެ ނުފޫޒުގަދަ ވަޒީރު ވިދާޅުވެފައިވެއެވެ.
ރައީސް ނަޝީދު އެމްޑީޕީން ވަކިވުމާއެކު އެމަނިކުފާނަށް ތާޢީދުކުރާ ގިނަ ބަޔަކު ދަނީ އެޕާޓީން ވަކިވެ، އަދި ސަރުކާރުގެ މަގާމުތަކުންވެސް ވަކިވެ އަލަށް އުފައްދާ ދަ ޑިމޮކްރެޓްސްއާ ގުޅެމުންކަން ފާހަކަކޮށްލާން ޖެހެއެވެ.
