ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ހުސްވެފައިވާ މެނޭޖިން ޑިރެކްޓަރުކަމުގެ މަގާމަށް ކުރީގެ ކޮންސްޓްރަކްޝަން މިނިސްޓަރު މުހައްމަދު މައުރޫފް ޖަމީލް އައްޔަނުކޮށްފިއެވެ.
ކުރީގެ ރައީސް މައުމޫނު ޢަބްދުޤައްޔޫމުގެ ދައުރުގައި އެޗްޑީސީގެ ސީއީއޯގެ މަޤާމުވެސް އަދާކުރައްވާފައިވާ، އަދި ހުޅުމާލެ އެންމެ ފުރަތަމަ ހިއްކަން ފެށިދުވަސްވަރުގައި، އޭރުގެ ކޮންސްޓްރަކްޝަން މިނިސްޓަރުކަމުގައި ހުންނެވި މަޢުރޫފު އެޗްޑީސީގެ އެމްޑީގެ މަޤާމަށް އައްޔަނުކުރައްވާފައި މިވަނީ، މަޝްރޫހު "ޣައިރުޤާނޫނީ" ބިންވެރިޔާ ސްކީމުގެ ދަށުން ގޯތި ނުލިބޭ ފަރާތަކަށް، ގޯތި ދިންކަމުގެ ތުހުމަތުގައި، އެޗްޑީސީ ތެރޭގައި މިހާރުކުރިއަށް ތަހުގީގާ ގުޅިގެން އެ ކުންފުނީގެ ކުރީގެ އެމްޑީ އިބްރާހީމް ފަޟުލު ރަޝީދު އިސްތިއުފާ ދެއްވުމާ ގުޅިގެންނެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)ން މީޑިއާތަކަށް އާދީއްތަ ދުވަހު ހެނދުނު ފޮނު މެސެޖެއްގައި ވަނީ، "ހައުސިންގ ޑިވެލޮޕްމަންޓް ކޯޕަރޭޝަންގެ މެނޭޖިން ޑިރެކްޓަރުކަމުގެ މަޤާމާއި ޑިރެކްޓަރުންގެ ބޯޑުގެ މެންބަރު ކަމުގެ މަޤާމަށް މ. ދޫރެސް އަލްފާޟިލް މުޙައްމަދު މަޢުރޫފް ޖަމީލު މިއަދު ވަނީ އައްޔަންކޮށްފަ" ކަމަށެވެ.
އެޗްޑީސީތެރެއަށް ފުލުހުން ވަދެ ތަހުގީގެއް ފަށާފައި މިވަނީ، ބިންވެރިޔާ ސްކީމަށް ޝަރުތު ހަމަވާ ލިސްޓުގައި، ފަޟުލުގެ ބޭބެ، އަދި އެމްޑަބްލިއުއެސްސީގެ ޑެޕިއުޓީ މެނޭޖިންގ ޑިރެކްޓަރުގެ ވަޒީފާއަދާކުރައްވަމުންދާ މުހައްމަދު ފަޒީލް ރަޝީދުގެ ނަން އެ ލިސްޓުގައި ނެތި އޭނާއަށް އެ ސްކީމްގެ ދަށުން ގޯތީގެ ރެޖިސްޓްރީއެއް ހަދާފައިވާކަން ފަޅާއެރުމުންނެވެ. އަދި މީގެ އިތުރުން އެހެން ބަޔަކަށްވެސް މިފަދައިން ވަގު ރަޖިސްޓަރީތަކެއް ހައްދާދީފައިވާކަމުގެ ތުހުމަތުގައެވެ.
މިކަމާ ގުޅިގެން ފަޟުލު ވިދާޅުވެފައި ވަނީ، ބިންވެރިޔާ ސްކީމަށް ޝަރުތު ހަމަނުވަނީސް އޭނާގެ ބޭބެ ފަޒީލު ޝަރުތު ހަމަވާ ކަމަށް ހަދައި ރަޖިސްޓްރީއެއް ހެދިފައިވަނީ އިއްތިފާގަކުން ކަމަށާއި، އެ މައްސަލަ ހައުސިން މިނިސްޓްރީގެ ސަމާލުކަމަށް އެޗްޑީސީން ގެނެސްފައިވާ ކަމަށެވެ.
