ފުލުހުންނާއި އޭސީސީ ގުޅިގެން މިހާރު ފަށާފައިވާ، މަޝްހޫރު ބިންވެރިޔާ ސްކީމްގެ ތަހުޤީޤަށް ފުރުސަތު ދިނުމަށާއި އަދި އެޗްޑީސީގެ ޚިދުމަތްތައް މެދުކެނޑުމެއް ނެތި ކުރިއަށް ގެންދިއުމަށް ފުރުޞަތު ދިނުމަށް ކަމަށް ވިދާޅުވެ، އެޗްޑީސީގެ މެނޭޖިންގ ޑިރެކްޓަރ އިބްރާހީމް ފަޟުލް ރަޝީދު އެ މަގާމުން އިސްތިއުފާ ދެއްވައިފިއެވެ.
ކުރީގެ ރައީސް އިބްރާހީމް މުޙައްމަދު ޞާލިހުގެ ސަރުކާރުން ކުރިއަށް ގެންދިޔަ މަޝްހޫ "ޣައިރުޤާނޫނީ" ބިންވެރިޔާ ސްކީމްގެ ދަށުން އޭރު ގޯތި ނުދޭ ބަޔަކަށް ގޯތިތަކެއް ދީފައިވާ މައްސަލައިގެ ތަހުގީގާ ގުޅިގެން އެޗްޑީސީގެ ބޯޑު އެއްކޮށް ސަސްޕެންޑްކޮށްފައި ވަނިކޮށް، މަޤާމުން އިސްތިއުފާ ދެއްވައި، ރައީސް ޑރ. މުޙައްމަދު މުޢިއްޒަށް ފަޟުލު ފޮނުއްވި ސިޓީގައި އޭނާ ވިދާޅުވީ، އެޗްޑީސީގެ އެމްޑީކަމުން އިސްތިއުފާ ދެއްވީ "ބިންވެރިޔާ ސްކީމާ ގުޅިގެން މިހާރު ކުރިއަށްދާ ތަހުގީގަށް ފުރުސަތު ދިނުމަށާއި، ކުންފުންޏާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުސަތު ދިނުމުގެ ގޮތުން،" ކަމަށެވެ.
ފަޟުލް ވިދާޅުވީ، "އަޅުގަނޑު އެދެނީ އެ ތުހުމަތުތަކުގެ ހަގީގަތް ވީ އެންމެ އަވަސް ފުރުސަތެއްގައި ރައްޔިތުންނަށް ހާމަވުމެވެ. އަދި މިކަމުގެ ސަބަބުން ކުންފުންޏާއި ސަރުކާރު ސިޔާސަތުތައް ހުއްޓިފައި އޮންނާކަށް އަޅުގަނޑު ނޭދެން،" ކަަމަށެވެ.
އޭގެ އިތުރުން، އެޗްޑީސީގެ އެމްޑީ ކަމުގައި އޭނާ ހޭދަކުރެއްވި މުއްދަތުގައި އެކި ގޮތްގޮތުން އޭނާއަށް ކޮށްފައިވާ އަދި މިހާރު އެކިއެކި ޕްލެޓްފޯމްތަކުގައި ކުރަމުންދާ ތުހުމަތުތަކަށް އިންކާރު ކުރައްވާކަމަށް ފަޟުލު ވިދާޅުވިއެވެ .އަދި އޭނާގެ އެމްޑީކަމުގައި، އެޗްޑީސީގެ ފަރާތުން މިހާތަނަށް ކޮށްފައިވާ ހުރިހާ މުއާމަލާތްތަކަކީ ކުންފުނީގެ ބޯޑުގެ ނިންމުންތަކާއި ޕޮލިސީތަކުގެ އިމުގެ ތެރެއިން ކުންފުނީގެ މަސްލަހަތު އިސްކޮށްގެން ކޮށްފައިވާ މުއާމަލާތްތައް ކަމަށް ވެސް އޭނާ ވިދާޅުވިއެވެ.
އެޗްޑީސީތެރެއަށް ފުލުހުން ވަދެ ތަހުގީގެއް ފަށާފައި މިވަނީ، ބިންވެރިޔާ ސްކީމަށް ޝަރުތު ހަމަވާ ލިސްޓުގައި، ފަޟުލުގެ ބޭބެ، އަދި އެމްޑަބްލިއުއެސްސީގެ ޑެޕިއުޓީ މެނޭޖިންގ ޑިރެކްޓަރުގެ ވަޒީފާއަދާކުރައްވަމުންދާ މުހައްމަދު ފަޒީލް ރަޝީދުގެ ނަން ލިސްޓުގައި ނެތި އޭނާއަށް އެ ސްކީމްގެ ދަށުން ގޯތީގެ ރެޖިސްޓްރީއެއް ހަދާފައިވާކަން ފަޅާއެރުމުންނެވެ. އަދި މީގެ އިތުރުން އެހެން ބަޔަކަށްވެސް މިފަދައިން ވަގު ރަޖިސްޓަރީތަކެއް ހައްދާދީފައިވާކަމުގެ ތުހުމަތުގައެވެ.
ފަޟުލު ވިދާޅުވެފައި ވަނީ، ބިންވެރިޔާ ސްކީމަށް ޝަރުތު ހަމަނުވަނީސް އޭނާގެ ބޭބެ ފަޒީލު ޝަރުތު ހަމަވާ ކަމަށް ހަދައި ރަޖިސްޓްރީއެއް ހެދިފައިވަނީ އިއްތިފާގަކުން ކަމަށާއި، އެ މައްސަލަ ހައުސިން މިނިސްޓްރީގެ ސަމާލުކަމަށް އެޗްޑީސީން ގެނެސްފައިވާ ކަމަށެވެ.
ޤާނޫނުއަސާސީއާ ކަނޑައެޅިގެން ޚިލާފު އުސޫލުތަކެއްގެ ތެރޭން ކުރިއަށް ގެންދިޔަ ބިންވެރިޔާ ސްކީމަކީ މިފަދަ އެތަކެއް އިއްތިފާގެއް ހިމެނޭ، ދިވެހި ދައުލަތަށާއި، އަދި އެތަކެއް ހާސް ރައްޔިތުންނަށް ފޫނުބެއްދޭވަރުގެ ގެއްލުމެއް ކުރިމަތިކުރުވާފައިވާ، މަޝްރޫއެކެވެ. އެގޮތުން، އޭރުގެ ސަރުކާރުގެ ސިޔާސީ މަގާމުތަކުގައި ތިއްބެވި ބޭފުޅުންނާއި އޭރުގެ ސަރުކާރުގެ މައި ޕާޓީއަށް ނިސްބަތްވާ މަޖިލީސް މެންބަރުންވެސް ހިމެނޭހެން، ހުޅުމާލެ ދެވަނަ ފިޔަވަހީގެ މުޙިއްމު ސަރަޙައްދުތަކުން ޖެހިޖެހިގެން 7 ގޯތި 8 ގޯތި ހަމަ އިއްތިފާގުން ލިބިފައިވާކަން ފާހަގަކުރެވެއެވެ. ނަމަވެސް ރައްޔިތުންގެ ކަންބޮޑުވުން އިންތިހާއަށް އޮތް މި މައްސަލައިގެ ތަހުގީ މިއަދާހަމައަށް ވެސް އަދުގެ ސަރުކާރުންވެސް ކުރިއަށް ނުގެންގޮސް ވަނީ، މިފަދަ ނާޖާއިޒު ފައިދާ ނެގުމަށް މަގުފަހިކުރުމުގެ ގޮތުންކަމަށް ކަމުގެ ތަޖްރިބާކާރުންނާއި ރައްޔިތުންދަނީ ބުނަމުންނެވެ.
