ކުރީގެ ރައީސް އިބްރާހީމް މުޙައްމަދު ޞާލިހުގެ ސަރުކާރުން ކުރިއަށް ގެންދިޔަ މަޝްހޫ "ޣައިރުޤާނޫނީ" ބިންވެރިޔާ ސްކީމްގެ ދަށުން އޭރު ގޯތި ނުދޭ ބަޔަކަށް ގޯތިތަކެއް ދީފައިވާ މައްސަލައިގެ ތަހުގީގާ ގުޅިގެން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ހިމެނޭގޮތަށް އެ ކުންފުނީގެ ބޯޑު އެއްކޮށް ސަސްޕެންޑްކޮށްފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން ނެރުނު ބަޔާނެއްގައި ބުނީ އެޗްޑީސީއާ ގުޅޭގޮތުން ފުލުހުން ފަށާފައިވާ ތަހުގީގަށް ޖާގަ ދިނުމުގެ ގޮތުން، ކުންފުނީގެ ޗެއާމަން އަހްމަދު ނާސިފް ފިޔަވައި، އަދި ކުންފުނީގެ މެނޭޖިން ޑިރެކްޓަރު ފަޟުލް ރަޝީދު ހިމެނޭހެން ޑިރެކްޓަރުންގެ ބޯޑުގެ ހުރިހާ މެންބަރުން ސަސްޕެންޑްކޮށްފައިވާ ކަމަށެވެ.
އެޗްޑީސީތެރެއަށް ފުލުހުން ވަދެ ތަހުގީގެއް ފަށާފައި މިވަނީ، ބިންވެރިޔާ ސްކީމަށް ޝަރުތު ހަމަވާ ލިސްޓުގައި، ފަޟުލުގެ ބޭބެ، އަދި މިވަގުތު އެމްޑަބްލިއުއެސްސީގެ ޑެޕިއުޓީ މެނޭޖިންގ ޑިރެކްޓަރުގެ ވަޒީފާއަދާކުރައްވަމުންދާ މުހައްމަދު ފަޒީލް ރަޝީދުގެ ނަން ނެތި އޭނާއަށް އެ ސްކީމްގެ ދަށުން ގޯތީގެ ރެޖިސްޓްރީއެއް ހަދާފައިވާކަން ފަޅާއެރުމުންނެވެ. އަދި މީގެ އިތުރުން އެހެން ބަޔަކަށްވެސް މިފަދައިން ވަގު ރަޖިސްޓަރީތަކެއް ހައްދާދީފައިވާކަމުގެ ތުހުމަތުގައެވެ.
މިކަމާ ގުޅިގެން އެޗްޑސީގެ އެމްޑީ ފަޟުލު ވިދާޅުވީ، ބިންވެރިޔާ ސްކީމަށް ޝަރުތު ހަމަނުވަނީސްމ އޭނާގެ ބޭބެ ފަޒީލު ޝަރުތު ހަމަވާ ކަމަށް ހަދައި ރަޖިސްޓްރީއެއް ހެދިފައިވަނީ އިއްތިފާގަކުން ކަމަށާއި، އެ މައްސަލަ ހައުސިން މިނިސްޓްރީގެ ސަމާލުކަމަށް އެޗްޑީސީން ގެނެސްފައިވާ ކަމަށެވެ.
ޤާނޫނުއަސާސީއާ ކަނޑައެޅިގެން ޚިލާފު އުސޫލުތަކެއްގެ ތެރޭން ކުރިއަށް ގެންދިޔަ ބިންވެރިޔާ ސްކީމަކީ މިފަދަ އެތަކެއް އިއްތިފާގެއް ހިމެނޭ، ދިވެހި ދައުލަތަށާއި، އަދި އެތަކެއް ހާސް ރައްޔިތުންނަށް ފޫނުބެއްދޭވަރުގެ ގެއްލުމެއް ކުރިމަތިކުރުވާފައިވާ، މަޝްރޫއެކެވެ. އެގޮތުން، އޭރުގެ ސަރުކާރުގެ ސިޔާސީ މަގާމުތަކުގައި ތިއްބެވި ބޭފުޅުންނާއި އޭރުގެ ސަރުކާރުގެ މައި ޕާޓީއަށް ނިސްބަތްވާ މަޖިލީސް މެންބަރުންވެސް ހިމެނޭހެން، ހުޅުމާލެ ދެވަނަ ފިޔަވަހީގެ މުޙިއްމު ސަރަޙައްދުތަކުން ޖެހިޖެހިގެން 7 ގޯތި 8 ގޯތި ހަމަ އިއްތިފާގުން ލިބިފައިވާކަން ފާހަގަކުރެވެއެވެ. ނަމަވެސް ރައްޔިތުންގެ ކަންބޮޑުވުން އިންތިހާއަށް އޮތް މި މައްސަލައިގެ ތަހުގީ މިއަދާހަމައަށް ވެސް އަދުގެ ސަރުކާރުންވެސް ކުރިއަށް ނުގެންގޮސް ވަނީ، މިފަދަ ނާޖާއިޒު ފައިދާ ނެގުމަށް މަގުފަހިކުރުމުގެ ގޮތުންކަމަށް ކަމުގެ ތަޖްރިބާކާރުންނާއި ރައްޔިތުންދަނީ ބުނަމުންނެވެ.
