ގެދޮރުވެރިކަމާއި، ބިމާއި ޢުމްރާނީ ތަރައްގީއާ ބެހޭ ވަޒީރު ޑރ. ޢަލީ ހައިދަރު އަޙްމަދަށް ވަރަށް ބޮޑަށް ފާޑުވިދާޅުވެ، " ހިހޫތަނުގައި ތިބެފައި ވައިކުޑައިން ފުއްމާލަނީ މިކަހަލަ، ނާގާބިލް" މީހުންނަކީ، "ރައްޔިތުންގެ ލޭބޯ، ސީދާ އެމީހުންގެ ދުޝްމަނުން" ކަމަށް ކުރީގެ ނައިބު ރައީސް ޑރ. މުޙައްމަދު ޖަމީލް އަޙްމަދު ވިދާޅުވެއްޖެއެވެ.
ޖަމީލް މިހެން ވިދާޅުވެފައި މިވަނީ، ނިމިދިޔަ އެމްޑީޕީ ސަރުކާރުގެ ދުވަސްވަރު "ގެދޮރުވެރިޔާ"ގެ ނަމުގައި ހިންގި ބޯހިޔާވަހިކަމުގެ މަޝްރޫޢުގެ ދަށުން ޢިމާރާތްކުރަމުން ގެންދާ 4،000 ފްލެޓާ ގުޅޭގޮތުން، ގެދޮރުވެރިކަމާއި ބެހޭ ވަޒީރު ވަރަށް ބޮޑަށް އިތުރުފުޅު ހައްދަވަމުން ގެންދަވާ ދަނޑިވަޅެއްގައެވެ.
ފްލެޓް ލިސްޓު ޢާންމުކުރުމާ ގުޅޭގޮތުން ނޫސްވެރިން ކުރިމަތި ކުރިސުވާލަކަށް ޖަވާބުދެއްވަމުން، "ހަފްތާ ފެށޭދުވަހުގެ ކުރީދުވަހު" ލިސްޓް ޢާންމުކުރައްވާނޭކަމަށް ވިދާޅުވެ އިތުރުފުޅު ހައްދަވާ ވީޑިއޯއެއް ޓެގްކުރައްވައި އެކްސްގައި ކުރެއްވި ޕޯސްޓެއްގައި ޑރ. ޖަމީލު ވިދާޅުވީ، "އެތަކެއް ހާސް ނިކަމެތި ރައްޔިތުންގެ ޙައްގަށް ވަޒީރު ހައިދަރު އަރައިގެންފި." ކަމަށެވެ.
ވޭތުވެދިޔަ އަށެއްކަ އަހަރުވެސް ސަރުކާރާ އިދިކޮޅަށް ވަރަށް ބޮޑަށް ފާޑުވިދާޅުވަމުން ގެންދަވާ، ޑރ. ޖަމީލް ވިދާޅުވީ " ބަޔަކު ހީކޮށްފާނެ، ތަޢްލީމް ހުރީމަ ރަނގަޅުވެދާނެއޭ. އެކަމަކު އެމީހެއްގެ އަމިއްލަ އިންޓަގްރިޓީ ނެތުމީ އެންމެ ބޮޑު އެއް މައްސަލަ. ޒިއްމާދާރުކަން ކުޑަކަމާ ހުރިބޮޑާކަން މި ވީޑިއޯއިންވެސް ފެނޭ." ކަމަށެވެ.
އޭނާ ވިދާޅުވީ މިހާރު ހައިދަރުވީ، " ފްލެޓްތަކުގެ އަތް އަޅާފައި މިހާރުވީ ކޮންތާކު؟ މަޖާކުރަން ގޮސްފަ." ކަމަށެވެ.
ފްލެޓް ލިސްޓް ޢާންމު ނުކުރެވިގެން އުޅެނީ، ޑރ. ހައިދަރުގެ އެހީގައި ރައީސް ޑރ. މުއިއްޒު ފްލެޓާއި ގޯތިން ކޮރަޕްޝަން ހިންގާތީ ކަމަށް ތުހުމަތުކުރައްވައި ޑރ. ޖަމީލް ވިދާޅުވީ " ސާޖިދާ އަދި ޕީއެންސީއިން އަންނަ ލިސްޓަށް ފްލެޓްތައް ބަހަން ތައްޔާރުވާ ކަމުގެ ބޮޑު ތުހުމަތެއް" އެބަ އޮތްކަމަށެވެ.
" ޔަގީނުންވެސް ހައުސިންގ ކޮމެޓީއާ ވަޒީރު މަޝްވަރާ ނުކުރައްވާ. މިއީ ޖިނާއީ ބޮޑެތި ޖަރީމާ. انشاء الله މިކަންތަކުގެ ނަތީޖާ މިކުށް ހިންގާ މިފަދަ ފަރާތްތަކާ ބައްދަލުކުރާނެ. މިފަހަރު ރައްޔިތުން ދުލެއް ނުދޭނެ! ގާނޫނު އަރާހަމަ ކުރާނެ." ވެސް ޑރ. ޖަމީލު ވިދާޅުވިއެވެ.
އަދި އިތުރަށް އޭނާ ވިދާޅުވީ، " ބަޔަކު ބުރަ މަސައްކަތްކޮށް ސަރުކާރު 5 އަހަރުން ބަދަލުކުރާއިރު ހިހޫތަނުގައި ތިބެފައި ވައިކުޑައިން ފުއްމާލަނީ މިކަހަލަ، ނާގާބިލް، ނަޒާޙަތްތެރިކަމެއް ނެތް މީހުން! މިމީހުންނަށް ރައްޔިތުންނީ ބައެއް ނޫން. މިއީ މުއިއްޒުގެ ޗަމްޗާއިން. ހެޔޮ މަޝްވަރާއެއް ދޭންވެސް ނުކުރޭ މުއިއްޒުގެ ކްރޯނީޒް." ކަމަށެވެ.
