ގަވާއިދަށް ތަބާވުމަކީ އެންމެންގެ މައްޗަށް ލާޒިމު ކަމެެއް ކަމަށާއި، ރިސޯޓުތަކާއި ގެސްޓްހައުސްތަކަށް ލިބޭ ޑޮލަރުގެ ތެރެއިން ވަކި މިންވަރެއް ބޭންކްތަކަށް މާރުކުރަންޖެހޭ ގޮތަށް ދިވެހިރާއްޖޭގެ މަރުކަޒީ ބޭންކު (އެމްއެމްއޭ) އިން ހަދާފައިވާ ބޭރުފައިސާއާ ބެހޭ ގަވާއިދު ބަދަލުނުކުރައްވާނޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނުގެ ސަރުކާރަށް 52 ހަފްތާ ފުރުން ފާހަގަކުރުމަށް، ވެރިކަންކުރާ ޕީއެންސީން، އެމްސީއެސްއީ ގޯތިރޭގައި ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ރައީސް ވިދާޅުވީ، "ވަރަށް ސާފުކޮށް މިދަންނަވަނީ، ގަވާއިދު ބަދަލެއް ނުކުރާނަމޭ. 500 ޑޮލަރު މާރު ކުރަށްވަން ޖެހިވަޑައިގަންނަވާނެ،"
ރައީސް ވިދާޅުވީ "ގަވާއިދަށް ތަބާވުމަކީ އެންމެންގެ މައްޗަށް ލާޒިމު ކަމެކޭ. މިކަން ކުރަށްވަން ޖެހިވަޑައިގަންނަވާނެ" ކަމަށެވެ.
ރައީސް މިހެން ވިދާޅުވެފައި މިވަނީ، ފަތުރުވެރިކަމުގެ ސިނާއަތުގައި އެންމެ ދުވަސްވީ، އަދި އެންމެ ބޮޑެތި ބައެއް ވިޔަފާރިވެރީން، ޑޮލަރު މާރުކުރާ ގަވާއިދަށް ޢަމަލުނުކުރާނޭކަމަށާއި އެ ގަވާއިދު އަނބުރާ ގެންދިއުމަށް ގޮވާލައި ސަރުކާރަށް ގޮންޖަހާފައިވާ ދަނޑިވަޅެއްގައެވެ.
ޑޮލަރުގެ ދަތިކަން އިންތިހާއަށް ބޮޑުވެ، ޑޮލަރު ލިބޭމީހުން އުފައްދާފައިވާ ކަޅުބާޒާރުގައި ޑޮލަރެއްގެ އަގު 19.50ރއަށް އުފުލިވައިފާ މި ދަނޑިވަޅުގައި، އެކަން ހައްލުކުރުމަށް ސަރުކާރުން އަޅަމުންދާ ފިޔަވަޅުތަކާ ބެހޭގޮތުން ވާހަކަފުޅު ދައްކަވަމުން، ރައީސް މުޢިއްޒު ފާހަގަކުރެއްވި ގޮތުގައި، ފަތުރުވެރިކަމުގެ ދާއިރާއިން އެކަނިވެސް ވޭތުވެދިޔަ އަހަރު ޖުމްލަ އާމްދަނީގެ ގޮތުގައި 4.5 ބިލިއަން ޑޮލަރު ރާއްޖެއަށް ވަދެފައިވެއެވެ. ނަމަވެސް ރާއްޖޭގެ ބޭންކުތަކަށް މާރުކޮަށްފައި ވަނީ އޭގެ 1.5 ޕަސަންޓުކަމަށެވެ.
ރައީސް ޑރ. މުޢިއްޒު އިތުރަށް ވިދާޅުވީ، އެމްއެމްއޭގެ އާ ގަވާއިދު ތަންފީޒު ކުރުމަށް އިތުރަށް އެހީތެރިކަން ބޭނުންވެއްޖެ ނަމަ، އެކަމަށް ޚާއްސަ ފޮރެކްސް ޤާނޫނެއް ވެސް ފާސްކުރައްވާނޭކަމަށެވެ.
