ސައުދީ ވަލީއަހުދު މުހައްމަދު ބިން ސަލްމާނާއި އީރާނުގެ ޚާރިޖީ ވަޒީރު ސައީދު އައްބާސް އަރަގްޗީ ބައްދަލުކުރައްވައި، އެ ސަރަޙައްދަށް ފެތުރެމުންދާ ސަހްޔޫނީންގެ ބަލާވެރިކަމުން ސަލާމަތްވުމަށް މަޝްވަރާތަކެއް ކުރައްވައިފިއެވެ.
އިސްލާމީ ދުނިޔޭގައި މިވަގުތު އޮތް އެންމެ ބާރު ގަދަ ދެ ގައުމުކަމަށްވާ ސަޢުދީއާއި އީރާނަކީ ސިޔާސީ ގޮތުން ވަރަށް ބޮޑަށް ޚިޔާލުތަފާތު ދެގައުމެވެ. ނަމަވެސް، އެ ދެބޭފުޅުންގެ ބައްދަލުކުރެއްވުމުގައި ވަނީ، ފަލަސްތީނުގެ ބިންތައް އިސްތިޢުމާރުކޮށްގެން ތިބި، ސަހްޔޫނީ ޔަހޫންގެ ސަބަބުން މެދުއިރުމަތީގައި ފެތުރެމުންދާ ހަމަނުޖެހުންތައް ހުއްޓުވާން، ގައުމުތައް ގުޅިގެން ގޮތްތަކެއް ހޯދުމަށް މަޝްވަރާކުރައްވައިފައެވެ.
ވަލީއަހުދު ވިދާޅުވީ، "އަހަރެމެން ބޭނުންވަނީ ސުލްހައިގެ ވާހަކަތައް، ހަނގުރާމައެއް ނޫން،" ކަމަށެވެ. އަދި އެ ބޭފުޅުންގެ ބައްދަލުވުމުގެ މައިގަނޑު މަގްސަދަކީ އެ ސަރަހައްދު ހަމައަކަށް އެޅުވުންކަމަށެވެ.
އަރަގްޗީ ވަނީ ހާލަތު އިތުރަށް ގޯސްވެދާނެ ފަދަ އަމަލުތައް ނުކުރުމަށް އިންޒާރު ދީފައެވެ. އަދި ސަހްޔޫނީ ޓެރަރިސްޓް ދައުލަތުގެ އަނިޔާވެރިކަމުގެ ސަބަބުން އެ ސަރަހައްދުގައި އިތުރު މައްސަލަތައް ކުރިމަތިވަމުންދާ ކަމުގެ އިންޒާރު ވެސް އޭނާ ދެއްވިއެވެ. އަދި މި ގޮންޖެހުންތައް ޙައްލުކުރުމަށް، ވިސްނުންތެރިކަމާއި ބުއްދިވެރިކަމާއި އަދި ހިތްވަރާއި އެއްބާރުލުން ދެއްވުމަށް އޭނާ ގޮވާލެއްވިއެވެ.
ސަޙްޔޫނީ ޓެރަރިސްޓުންނާއި އަދި އެ ބައިގަނޑާ ގުޅިފައިވާ އެމެރިކާއާ ހުޅަނގުގެ ގައުމުތަކުގެ ނުރައްކާތެރިކަން، ފަލަސްތީނާއި ލުބުނާނުގެ އިތުރުން، އީރާނާއި ޔަމަނާއި އެނޫންވެސް އިސްލާމީ ގައުމުތަކަށް ކުރިމަތިވަމުންދާ މި ދަނޑިވަޅުގައި، އީރާނާއި ސަޢުދީއާ ދެމެދު މިފަދަ މަޝްވަރާތަކެއް ކުރެވުމަކީ މި ދެގައުމުގެ ގުޅުން ހަރުދަނާވެ ބަދަހިކުރުމަށް އެޅުނު މުޙިއްމު ފިޔަވަޅުތަކެކެވެ.
