އެމެރިކާއިން ނިއުކްލިއާ ސަބްމެރިންއެއް ދެކުނު ކޮރެއާގެ ބުސާން އަށް ފޮނުވުމުން އުތުރު ކޮރެއާ ވަރަށް ބޮޑަށް ރުޅިގަދަވެއްޖެއެވެ.
މިއީ މީގެ ހަތަރު އަހަރު ކުރިން ބަނދެފައިވާ ޔޫއެސްއެސް ވާމޮންޓް ދެކުނު ކޮރެއާއަށް ފޮނުވި ފުރަތަމަ ފަހަރެވެ.
އުތުރު ކޮރެއާގެ ލީޑަރުގެ ކޮއްކޮ ކިމް ޔޯ ޖޮންގް ވަނީ އެމެރިކާއަށް ވަރަށް ބޮޑަށް ފާޑުވިދާޅުވެފައެވެ. ސަބްމެރިން ފޮނުވުމަކީ އުތުރުކޮރެއާއަށް ކުރި ފުރައްސާރައެއް ކަމަށާއި އޭގެ ސަބަބުން އުތުރަށް އިތުރު ހިތްވަރެއް ލިބިފައިވާކަމަށް އެކަމަނާ ވިދާޅުވިއެވެ.
އެކަމަނާ ވިދާޅުވީ އުތުރު ކޮރެއާގެ ބާރާމެދު އެމެރިކާ ވަރަށް ބޮޑަށް ބިރުގަނެ ޖެހިލުންވާކަމަށެވެ.
ދެކޮރެއާގެ ހާލަތު އިތުރަށް ގޯސްވަމުންދާ މިދަނޑިވަޅުގައި، ކިމް ޔޯ ޖޮންގް ވަނީ އުތުރު ކޮރެއާގެ ނިއުކްލިއާ ހަތިޔާރު ވަރުގަދަ ކުރާނެ ކަމަށް ވައުދުވެވަޑައިގެންފައެވެ.
އެކަމަނާ ވިދާޅުވީ މިއީ އެ ސަރަހައްދަށް ޖެހިފައިވާ އެމެރިކާގެ މުސީބާތް ބޮޑުވަމުން ދާތީ ކޮންމެހެން ކުރަން ޖެހިފައިވާ ކަމެއް ކަމަށެވެ.
