ބަދަލު ހިފުމުގެ ގޮތުން، އީރާނުން ފޮނުވާލި ވަރުގަދަ މިސައިލްތަކުގެ ސަބަބުން އިޒްރޭލުގެ އަސްކަރީ ބައެއް ތަންތަނަށް ވަރަށް ބޮޑެތި ގެއްލުންތަކެއް ލިބިފައި ވާކަމަށް ވޮޝިންޓަން ޕޯސްޓުން ރިޕޯޓްކޮށްފިއެވެ.
ރިޕޯޓުތައް ބުނާގޮތުން، ސަޙްޔޫނީން ފޭރިގެންފައިވާ ފަލަސްތީނުގެ ބިންތަކުން ތިން ސަރަހައްދަކަށް 23 ވަރަކަށް މިސައިލް ވަނީ އަމާޒުވެފައެވެ. އެގޮތުން އެންމެ ބޮޑު ގެއްލުމެއް ލިބިފައި ވަނީ، އިޒްރޭލުގެ އެންމެ ވަރުގަދަ އެއް ވައިގެ މަރުކަޒު ކަމަށްވާ ނެވަޓިމް އެއާބޭސްއެވެ. އެތަނަށް 20 މިސައިލް އަރާފައިވާކަމަށްވެއެވެ. އަދި މީގެ އިތުރުން ޓެލް ނޯފް ބޭސްއަށް ތިން މިސައިލެއް އަރާފައިވާކަމަށް ރިޕޯޓުތައް ބުނެއެވެ.
އީރާނުގެ ހަމަލާތަކުން މާބޮޑު ގެއްލުމެއް ލިބިފައި ނުވާކަމަށް މީގެ ކުރީން ފަލަސްތީނުގެ ބިންތައް ފޭރިގަނެގެން އުޅޭ ޔަހޫދީ ބައިގަނޑާއި އަދި މި ޓެރަރިސްޓުންގެ އެންމެ ގާތް މިތުރު އެމެރިކާއިން ވަނީ ބުނެފައެވެ. ނަމަވެސް، އެމެރިކާގެ މަސްދަރުތަކުން ހާމަކޮށްފައިވާ ވަރަށްވުރެވެސް ބޮޑު ގެއްލުމެއް އީރާނުގެ ހަމަލާތަކުން ލިބިފައިވާ ކަމަށް މެދުއިރުމަތީގެ ބައެއް ފަރާތްތަކުން ބުނެއެވެ.
އިޒްރޭލޭ ކިޔާ އުދުވާނީ ޓެރަރިސްޓު ޖަމާޢަތުން ވަނީ އީރާނުގެ ހަމަލާ ކުށްވެރިކޮށް، ފަލަސްތީނުގެ ބިންތައް ފޭރިގެން އުޅޭ ސަހްޔޫނީ ރައްޔިތުންނާއި އަދި އެމީހުންގެ ސަރަހައްދުތައް ދިފާޢުކުރާނޭ ކަމަށާއި އަދި އީރާނަށް ވަރުގަދަ ރައްދެއް ދޭނޭކަމުގެ އިންޒާރުވެސް ދީފައެވެ.
