ފަލަސްތީނާއި ލުބްނާން އަދި ޔަމަނުގައި ހަރަކާތްތެރިވާ މުޖާހިދުންގެ ޖަމާޢަތްތަކަށް، ކޮންމެ ޙާލަތެއްގައިވެސް ތާއީދު ކުރައްވާނެ ކަމަށް އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.
އަރަގްޗީ ވިދާޅުވީ، ފަލަސްތީނާއި ލުބުނާނާއި އަދި ޔަމަނުގައި، ސަހްޔޫނީންގެ އަޅުވެތިކަމާ ދެކޮޅަށް ޖިހާދުކުރަމުންދާ ހަނގުރާމަވެރިން މަސައްކަތް ކުރަނީ މިނިވަންކަމާ އެކުގައި ކަމަށާއި. ނަމަވެސް އީރާނުން އެ މީހުންގެ މަސައްކަތަށް ފުރިހަމައަށް އެއްބާރުލުން ދޭނޭކަމަށެވެ. އަދި ފަލަސްތީނުގެ ބިންތައް ގަދަކަމުން ފޭރިގަނެގެން އުޅޭ ސަހްޔޫނީ ޓެރަރިސްޓުން ދޭ ކޮންމެ ހަމަލާއަކަށް ތެހެރާނުން ދޭ ރައްދު ކުރިއަށްވުރެ ވަރުގަދަވާނެ ކަމުގެ އިންޒާރު ވެސް އޭނާ ދެއްވިއެވެ.
މެދުއިރުމަތީގެ ނުތަނަވަސްކަން އިތުރުވަމުންދާ މި ދަނޑިވަޅުގައި ސީރިއާއަށް ކުރެއްވި ދަތުރުފުޅުގައި އަރަގްޗީ ވަނީ ދިމިޝްޤުގައި ރައީސް ބައްޝާރުލް އަސަދާވެސް ބައްދަލުކުރައްވައިފައެވެ. އަދި އޭނާ ވަނީ މި ދަތުރުފުޅުގައި ސީރިއާގެ އިތުރުން ލުބުނާނުގެ ހިޒްބުﷲއާއި ފަލަސްތީނުގެ ހަމާސްގެ އިސް ފަރާތްތަކާވެސް ބައްދަލުކުރައްވައިފައެވެ.
