އޮކްޓޯބަރ 7، 2023ން ފެށިގެން މެދުކެނޑުމެއް ނެތި، ސަހްޔޫނީ ޓެރަރިސްޓުން ފަލަސްތީނުގެ ޣައްޒާއަށް ދެމުން އަންނަ ޢުދުވާނީ ހަމަލާތަކުގައި، އެ ސިޓީގެ 79 އިންސައްތަ މިސްކިތް ހަލާކުކޮށްލާފައިވާ ކަމަށް ޣައްޒާގެ ދީނީ ވުޒާރާއިން ބުނެފިއެވެ.
ފަލަސްތީނުގެ ބިންތަކަށް ވެރިވެގަނެގެން އުޅޭ ސަހްޔޫނީ ޓެރަރިސްޓު ގުންޑާއިން ވަނީ ޣައްޒާގެ 1245 މިސްކިތުގެ ތެރެއިން 814 މިސްކިތެއް ފުނޑުފުނޑުކޮށްލައި، އިތުރު 148 މިސްކިތަކަށް ބޮޑެތި ގެއްލުންތަކެއް ދީފައެވެ.
މީގެ އިތުރުން ތިން ފައްޅިއެއް ހަލާކުވެފައިވާއިރު، 60 ގަބުރުސްތާނުގެ ތެރެއިން 19 ގަބުރުސްތާނެއް ވަނީ ހަލާކުކޮށްލައިފައެވެ. އެގޮތުން، މިހާތަނަށް ހަމަ އެކަނި ފާހަގަ ކުރެވުނު ތަންތަނަށް ލިބިފައިވާ ގެއްލުމުގެ އަގު 350 މިލިއަން ޑޮލަރަށް އަރާނޭކަމަށް އެ ވުޒާރާއިން ލަފާކުރެއެވެ.
ޣައްޒާގެ ދީނީ ވުޒާރާއިން ތުހުމަތު ކުރާ ގޮތުގައި އިޒްރޭލުން ވަނީ ގަބުރުތައް ހަލާކުކޮށް، މަރުވެފައިވާ ފަރާތްތަކާ މެދުވެސް އަނިޔާވެރި އަމަލުތައް ހިންގާފައެވެ. މީގެ އިތުރުން ޣައްޒާގެ އިދާރީ އަދި ތައުލީމީ 11 ތަނެއް އެއްކޮށް ސުންނާފަތި ކޮށްލާފައިވާކަމަށް ވެސް އެ ވުޒާރާއިން ފާހަގަކުރެއެވެ.
މީގެ އިތުރުން ސަހްޔޫނީ ޓެރަރިސްޓުން ވަނީ، މަގުތަކާއި ޢާންމުންގެ ގެތަކާއި، ވިޔަފާރިތައް ހިމެނޭހެން، ޣައްޒާގެ ބޮޑުބައެއް ވީރާނާކޮށްލައިފައެވެ.
ޣައްޒާގެ ދީނީ ވުޒާރާއިން ވަނީ ފަލަސްތީނުގެ ބިންތަކަށް ނުހައްގުން އަރައިގަނެ، ވެރިވެގެން އުޅޭ ސަހްޔޫނީ ޓެރަރިސްޓުން ކުށްވެރިކޮށް، މި ބައިގަނޑު މައިތިރިކުރުމަށް ބައިނަލްއަގްވާމީ މުޖުތަމައުން ނުފޫޒު ފޯރުވުމަށް އިލްތިމާސްކޮށްފައެވެ.
ސަހްޔޫނީ ޓެރަރިސްޓުން ޣައްޒާއަށް މިފަހަރު ހަމަލާދޭން ފެށިތާ އަހަރެއް ވާން ކުޑަތަން ވެފައިވާއިރު، މިހާތަނަށް 41،820 އަށް ވުރެ ގިނަ މީހުން ވަނީ ޝަހީދުކޮށްލައިފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި 96،800 އަށް ވުރެ ގިނަ މީހުން ވަނީ ޒަހަމްވެފައެވެ.
