އިންޑިއާގެ ޗަތިސްގަރްގެ، އަބޫޖުމާދު ޖަންގަލީގައި އިންޑިއާގެ އަސްކަރިއްޔާއިން ސަލާމަތީ ގޮތުން ހިންގި އޮޕަރޭޝަނެއްގައި، މާއޮއިސްޓް ހަނގުރާމަވެރިންކަމަށް ޝައްކުކުރެވޭ ބަޔަކާ ދެމެދު ބަދަލުކުރި ހަމަލާތަކެއްގައި ހަނގުރާމަވެރީންގެ 31 މީހުން މަރާލައިފިއެވެ.
ޗަތިސްގަރު ފުލުހުން ބުނީ މި އޮޕަރޭޝަން ފަށާފައިވަނީ މިދިޔަ ބުރާސްފަތި ދުވަހު ކަމަށެވެ. ނުވަ ގަޑިއިރަށް ދެމިގެން ދިޔަ އެ އޮޕަރޭޝަންގައި ހަނގުރާމަވެރިން ވަށާލީ އިންޑިއާގެ އިންޓެލިޖެންސްގައި ހަރަކާތްތެރިވާ ސްޕެޝަލް ޓާސްކް ފޯސް (އެސްޓީއެފް)ން ކަމަށް ރިޕޯޓުތައް ބުނެއެވެ.
އިންޑިއާގެ އިދާރާތަކުން ރިޕޯޓުކުރާ ގޮތުން މި ހާދިސާގައި ސަލާމަތީ ބާރުތަކުގެ ތެރެއިން އެއްވެސް މީހަކަށް ގެއްލުމެއް ލިބިފައެއް ނުވެއެވެ. އަދި ހަނގުރާމަވެރީންގެ އަތުން އޮޓޮމެޓިކް ރައިފަލްފަދަ ގިނަ ހަތިޔާރުތަކެއް ފެނިފައިވެއެވެ.
މިއީ މިއަހަރު އިންޑިއާގައި ހިނގި މިފަދަ އެންމެ ނުރައްކާތެރި ހަމަނުޖެހުންތަކެވެ. ނަކްސަލިސްޓުންގެ ނަމުން ނަން ދީފައިވާ މާއޮއިސްޓް ހަނގުރާމަވެރިން ނަކީ 1967 ވަނަ އަހަރުން ފެށިގެން ސަރުކާރާ ދެކޮޅަށް ހަނގުރާމަ ކުރަމުން އަންނަ ބައެކެވެ. ރަށްފުށު ސަރަހައްދުގެ ފަގީރުންނަށް އިތުރު ވަޒީފާތަކާއި ބިމާއި މުއްސަނދިކަން ހޯދުމަށް އެމީހުން އަބަދުވެސް ވަކާލާތުކުރެއެވެ.
އިންޑިއާ ސަރުކާރުން ދެކޭ ގޮތުގައި މާއޮއިސްޓުންނަކީ އިންޑިއާގެ ސަލާމަތަށް އޮތް ބޮޑު ނުރައްކަލެކެވެ. މައިގަނޑު ގޮތެއްގައި މި ޖަމާއަތް ހިންގަނީ "ރެޑް ކޮރިޑޯ"ގެ ނަމުން ނަންދީފައިވާ ރަށްފުށުގެ އަދި ޖަންގަލީގެ ސަރަހައްދުތަކުގައެވެ.
