ހިފާފައިވާ ފަލަސްތީނުގެ ބިންތަކަށް (އިޒްރޭލަށް) ދާދި ފަހުން ދިން ވަރުގަދަ މިސައިލް ހަމަލާތަކަށް ފަހު، ރަޝާއިން، އެސް-400 ޓްރިއުއެމްއެފް އެއާ ޑިފެންސް ސިސްޓަމްތަކެއް އީރާނަށް ފޯރުކޮށްދީފައިވާ ކަމަށް އިޒްރޭލާއި އެމެރިކާގެ މަސްދަރުތަކުން ފިޕޯޓުކޮށްފިއެވެ.
އެސް-400 އަކީ ދުނިޔޭގެ އެންމެ ޒަމާނީ ވައިގެ ދިފާއީ ނިޒާމެވެ. އެއީ ދުރު ރާސްތާގައި މަތިންދާބޯޓާއި މިސައިލް އަދި ޑްރޯންތަކަށް ވެސް އަމާޒުކުރުމުގެ ގާބިލްކަން ލިބިފައިވާ ނިޒާމެކެވެ.
ރިޕޯޓުތައް ބުނާގޮތުން، އީރާނުން އެސް-400 ހަރުކުރަން ނިންމާފައި ވަނީ އެގައުމުގެ ނިއުކްލިއާ ފެސިލިޓީތައް ފަދަ މުހިންމު ސައިޓްތަކުގައެވެ. ރަޝާގެ ޒަމާނީ އަސްކަރީ ނިޒާމާއެކު، އީރާނުގެ އަސްކަރީ ގާބިލުކަން އިތުރުވެގެންދާނެއެވެ.
ރަޝާއިން އީރާނަށް ވައިގެ ދިފާއީ ނިޒާމެއް ފޯރުކޮށް ދިނުމުގެ ސަބަބުން ފަލަސްތީނުގެ ބިންތަކަށް ވެރިވެގަނެގެން ތިބި ސަހްޔޫނީ ޓެރަރިސްޓުންނާއި އެވެރީންގެ ވާގިވެރީން ވަނީ ކަންބޮޑުވުން ފާޅުކޮށްފައެވެ. އަދި މީގެ ސަބަބުން ސަރަޙައްދީ ނުތަނަވަސްކަމާއި ހަމަނުޖެހުންތައް އިތުރުވެދާނެ ކަމުގެ ބިރު އެމީހުންދަނީ ދައްކަމުންނެވެ.
ހަމާސްގެ ޕޮލިޓިކަލް ބިއުރޯގެ ވެރިޔާ އިސްމާއިލް ހަނިއްޔާ އާއި ހިޒްބުاللهގެ ސެކްރެޓަރީ ޖެނެރަލް ސައްޔިދު ހަސަން ނަސްރުالله އަދި އައިއާރްޖީސީގެ ޖެނެރަލް އައްބާސް ނިލްފޮރޫޝާން އަވަހާރަކޮށްލުމާ ގުޅިގެން ބަދަލު ހިފުމުގެ ގޮތުން އޮކްޓޯބަރ 1ގައި އީރާނުން ވަނީ، "އޮޕަރޭޝަން ޓްރޫ ޕްރޮމިސް2.0"ގެ ނަމުގައި، ހިފާފައިވާ ފަލަސްތީނުގައި ސަހްޔޫނީން ޤާއިމުކޮށްފައިވާ އަސްކަރީ މަރުކަޒުތަކަށް 180 ވަރަކަށް މިސައިލް ހަމަލާ ފޮނުވާލައިފައެވެ. އެއާއެކު ސަޙްޔޫނީ ޓެރަރިސްޓުން ވަނީ، އެމެރިކާގެ މަދަދާއެކު އީރާނުގެ ހަމަލާގެ ބަދަލު ހިފާނެކަމަށް ބުނެ އިންޒާރު ދީފައެވެ.
