ކޮންމެ ގައުމަކަށްވެސް ޢުދުވާނާ ދެކޮޅަށް އަމިއްލަ ނަފުސު ދިފާއުވުމުގެ ހައްގު ލިބިގެންވާ ކަމަށް އީރާނުގެ އެންމެ މަތީ ލީޑަރު އާޔަތުالله އަލީ ޚާމަނާއީ ވިދާޅުވެއްޖެއެވެ.
ހުކުރު ދުވަހު، ތެހެރާނުގެ މުޞައްލާ މިސްކިތުގައި، ރައިފަލެއް ހިއްޕަވައިގެން ހުންނަވައި ދެއްވި ހުޠުބާގައި ޚާމަނާއީ ވިދާޅުވީ، އޮކްޓޯބަރ 1ގައި އީރާނުން އިޒްރޭލަށް ދިން މިސައިލް ހަމަލާއަކީ، ގާނޫނީ ގޮތުން ބާރުލިދޭ، ސައްޙަ ހަމަލާތަކެއް ކަމަށެވެ. އަދި ކުރިއަށް އޮތްތާނގައިވެސް މިފަދަ ހަމަލާއެއް ދޭން ޖެހިއްޖެ ނަމަ އީރާން އޮތީ އެކަމަށް ފުރިހަމައަށް ތައްޔާރަށް ކަމަށް ޚާމަނާއީ ވިދާޅުވިއެވެ.
އީރާނުން އިޒްރޭލަށް ދިން މިސައިލް ހަމަލާއަށް ތައުރީފު ކުރައްވައި ޚާމަނާއީ ވަނީ، މިއީ އީރާނުގެ އަސްކަރިއްޔާއިން ކުރިއަށް ގެންދިޔަ، "އަލިގަދަ" މަސައްކަތެއްގެ ގޮތުގައި ސިފަކުރައްވައިފައެވެ.
ފާއިތުވީ 5 ވަރަކަށް އަހަރު ތެރޭގައި ޚާމަނާއީ ދެއްވި ފުރަތަމަ ޚުތުބާގައި، އޭނާ ވަނީ އިޒްރޭލަށް ތާއީދުކުރާ ކަމަށް ބުނެ އެމެރިކާ އަށާއި އެ ގައުމުގެ ބައިވެރިންނަށް ވަރަށް ބޮޑަށް ފާޑު ވިދާޅުވެފައެވެ. އަދި އެމީހުންގެ އަމަލުތަކުގެ ސަބަބުން ސަރަހައްދީ ސަލާމަތާއި ސުލްހައަށް ނުރައްކާވަމުންދާ ކަމަށް އޭނާ ވިދާޅުވިއެވެ.
ހިފާފައިވާ ފަލަސްތީނުގެ ބިންތަކުގައި ވެރިވެގަނެގެން އުޅޭ ސަހްޔޫނީންނާ ދެކޮޅަށް މިދިޔަ އަހަރުގެ އޮކްޓޯބަރ 7ގައި ހަމާސްއިން ދިން ހަމަލާތަކަށްވެސް ޚާމަނާއީ ވަނީ ތަޢުރީފުކުރައްވައިފައެވެ. އަދި އިޒްރޭލަކީ މުޅި ސަރަޙައްދުގެ ދުޝްމަނެއްގެ ގޮތުގައި ސިފަކުރައްވައި، ޚާމަނާއީ ވަނީ، ހަމާސްއާއި ހިޒްބުﷲއާއި އަދި އެނޫންވެސް އަޅުވެތިކަމާ ދެކޮޅަށް ޖިހާދުކުރަމުންދާ މުޖާހިދުން ކުރާ މަސައްކަތުގައި އެފަރާތްތަކުގެ ޤާބިލުކަން ދެގުނަ އިތުރުކުރުމަށް އެދިވަޑައިގެންނެވިއެވެ.
