އުތުރު ކޮރެއާގެ ލީޑަރު ކިމް ޖޮން އުން މިވަނީ ދެކުނު ކޮރެއާއިން އޭނާގެ ގައުމަށް ހަމަލާދީފިނަމަ ނިއުކްލިއަރ ބޭނުންކޮށްގެން ބަދަލު ހިފާނެ ކަމުގެ އިންޒާރު ދީފައެވެ. އެމަނިކުފާނު މިހެން ވިދާޅުވީ ސްޕެޝަލް ފޯސަސްގެ ޓްރެއިނިން ބޭސްއަކަށް ހުކުރު ދުވަހު، ކުރެއްވި ޒިޔާރަތެއްގައެވެ.
ކިމް ވިދާޅުވީ، އުތުރު ކޮރެއާއަށް ދޭ ކޮންމެ ހަމަލާއަކާ ކުރިމަތިލާނީ ނިއުކްލިއާ ހަތިޔާރު ހިމެނޭ ގޮތަށް އުތުރު ކޮރެއާއަށް ލިބިފައިވާ ފުރިހަމަ ހަމަލާ ދިނުމުގެ ގާބިލުކަމާ އެކު ކަމަށެވެ.
އޭނާ މި އިންޒާރު ދެއްވާފައި މިވަނީ ދެކުނު ކޮރެއާގެ ރައީސް ޔޫން ސުކް ޔޯލް ދާދި ފަހުން ދެއްކެވި ވާހަކަތަކާ ގުޅިގެންނެވެ. އުތުރު ކޮރެއާއިން ނިއުކްލިއާ ހަތިޔާރު ބޭނުންކޮށްފިނަމަ އެ ގައުމުގެ ވެރިކަން ނިމުމަކަށް ގެންނާނޭ ކަމުގެ އިންޒާރު ޔޫން ވަނީ ދެއްވާފައެވެ.
އުތުރު ކޮރެއާ އާއި ދެކުނު ކޮރެއާގެ ގުޅުން މިވަނީ އަނެއްކާވެސް ވަރަށް ނުތަނަވަސްވެފައެވެ. އުތުރު ކޮރެއާއިން މިސައިލް ޓެސްޓްތައް ކުރަމުން އަންނައިރު، ދެކުނު ކޮރެއާއިން ވަނީ އެމެރިކާއާއެކު އެގައުމުން ކުރިއަށް ގެންދާ އަސްކަރީ ތަމްރީނުތައް އިތުރުކޮށްފައެވެ.
އެމެރިކާއާއި ދެކުނު ކޮރެއާގެ އަމަލުތަކަށް ފާޑު ވިދާޅުވަމުން ކިމް ވިދާޅުވީ، އެ ގައުމުތަކުން ސަރަހައްދީ ސަލާމަތާއި ސުލްހައަށް ހުރަސްއަޅަމުންދާ ކަމަށެވެ. އަދި ދެކުނު ކޮރެއާގެ ލީޑަރަކީ އާދަޔާ ހިލާފު ބޭފުޅެއް ކަމަށް ވެސް އޭނާ ސިފަކުރެއްވިއެވެ.
މި ދެގައުމުގެ ގުޅުން ހީނަރުވެފައިވާއިރު، ދެ ފަރާތުން ވެސް ދަނީ ހަރުކަށި ބަހުގެ ހަމަލާތައް ބަދަލުކޮށް، އަސްކަރީ ގޮތުން ވަރުގަދަކަން ވެސް ދައްކަމުންނެވެ.
