އިޒްރޭލުން ޣައްޒާއާ ދެކޮޅަށް ކުރަމުންދާ ހަނގުރާމައާ ބެހޭ ގޮތުން، ހަމާސްގެ އިސް ވަފުދެއް އީރާނުގެ ރައީސް މަސްއޫދު ޕެޒެޝްކިއަންއާ ދޯހާގައި ބައްދަލުކުރައްވައި މަޝްވަރާކޮށްފިއެވެ.
މިކަމާ ގުޅިގެން ހަމާސްއިން ނެރުނު ބަޔާނުގައި ބުނެފައިވަނީ އެ ވަފުދުގައި އިސްކޮށް ހުންނެވީ ހަމާސްގެ ޝޫރާ ކައުންސިލްގެ ޗެއާމަން މުހައްމަދު ދަރްވިޝް ކަމަށެވެ. އޭގެ އިތުރުން ޚާލިދު މެޝާލް، ޚަލީލް އަލްހައިޔާ، ހުސާމް ބަދްރަން އަދި މުޙައްމަދު ނަސްރު ހިމެނިވަޑައިގަންނަވައެވެ. އީރާނުގެ ރައީސާއެކު އެގައުމުގެ ވަފުދުގައި ހިމެނިވަޑައިގަންނަވަނީ ޚާރިޖީ ވަޒީރު އައްބާސް އަރަގްޗީ އާއި ސަފީރު އަލީ ސާލިހް އަބާދީއެވެ.
ފަލަސްޠީނުގައި ހިނގަމުންދާ ސިޔާސީ އަދި ހަނގުރާމައިގެ މައިދާނުގައި ހިނގަމުންދާ ކަންކަމާއި، ޚާއްޞަކޮށް އިސްރާއީލުން ޣައްޒާއަށް ދެމުންދާ ޙަމަލާތަކާއި، އަދި ލުބުނާނަށް މިހާރު ފުޅާކޮށްފައި ހަނގުރާމައާ ބެހޭގޮތުން އެބޭފުޅުން މަޝްވަރާކުރެއްވިއެވެ.
ހަމާސްގެ ވަފުދުން ވަނީ އީރާނުން ފަލަސްތީނުގެ މިނިވަންކަމަށް މަސައްކަތްކުރާ ފަރާތްތަކާ އެކު ބާއްވާ ޚާއްސަ ގުޅުމަށް އަލިއަޅުއްވާލައްވައި، ފަލަސްތީނުގެ ރައްޔިތުން "ސަހްޔޫނީ ދުޝްމަނުންނާ" ދެކޮޅަށް ކުރަމުންދާ މަސައްކަތުގައި، އީރާނުން މެދުކެނޑުމެއް ނެތި ލިބެމުންދާ އެހީތެރިކަމާއި އެއްބާރުލުމަށް ތައުރީފުކޮށްފައެވެ. އަދި ހިޒްބުاللهގެ ސެކްރެޓަރީ ޖެނެރަލް ހަސަން ނަސްރުاللهއާއި އެހެނިހެން ލީޑަރުން އިޒްރޭލުން ހަމަލާދީ އަވަހާރަކޮށްލުމާ ގުޅިގެން ތައުޒިޔާ ފާޅުކުރިއެވެ.
އީރާންގެ ރައީސް ޕެޒެޝްކިއަން ސިފަކުރެއްވި ގޮތުގައި ހަމާސްގެ ޕޮލިޓިކަލް ބިއުރޯގެ ވެރިޔާ އިސްމާއިލް ހަނިއްޔާ އަވަހާރަކޮށްލުމަކީ އޭނާގެ ހަޔާތުގައި ހިނގި އެންމެ ވޭންދެނިވި ހާދިސާއެވެ. ޑިމޮކްރަސީއާއި އިންސާނީ ހައްގުތަކުގެ ނަމުގައި އިޒްރޭލަށް ތާއީދުކުރާ ކަމަށް ބުނެ އެމެރިކާ އާއި ހުޅަނގުގެ ގައުމުތަކަށް އޭނާ ވަނީ ވަރަށް ބޮޑަށް ފާޑު ވިދާޅުވެފައެވެ.
އޭނާ ވިދާޅުވީ، މިއަދު ޣައްޒާއާއި ލުބްނާނުގައި ސަހްޔޫނީން ހިންގާ ޖަރީމާތަކަކީ އިންސާނިއްޔަތުކަން ހުރި ކޮންމެ ފަރާތެއްގެ ވެސް ހިތަށް ހެރޭ ހަންޖަރެއްގެ ގޮތުގައި ސިފަކުރައްވައިފައެވެ.
