ސުލްހައަކީ އިސްތިއުމާރާއި ހަމަނުޖެހުންތަކާ އެކުގައި ދެމިއޮންނާނެ ކަމެއް ނޫން ކަމަށާއި، ފަލަސްތީނާއި ލުބުނާނާ ދެކޮޅަށް އިޒްރޭލުގެ ސަހްޔޫނީން ހިންގަމުންދާ އަނިޔާވެރި ހަމަލާތައް ހުއްޓުވުމަށް ބައިނަލްއަގްވާމީ މުޖުތަމައުގެ ކިބައިން، ފަލަސްތީނުގެ ރައީސް މަޙްމޫދު އައްބާސް އެދިވަޑައިގެންފިއެވެ.
ދޯހާގައި މިހާރު ކުރިއަށްދާ އޭޝިއަން ކޯޕަރޭޝަން ޑައިލޮގް ސަމިޓްގައި ވާހަކަފުޅު ދައްކަވަމުން މަހްމޫދު އައްބާސް ވަނީ، ހިފާފައިވާ ފަލަސްތީނުގެ ބިންތައް މިނިވަންކުރުމަށާއި، ފަލަސްތީނުގެ ބިންތަކުގައި އިޒްރޭލުގެ ސަހްޔޫނީން އާބާދުކުރުން ހުއްޓާލުމަށް ގޮވާލައްވައިފައެވެ.
ޣައްޒާއާއި ހުޅަނގު އައްސޭރި އަދި އިރުމަތީ ގުދުސްގައި ހިނގަމުންދާ ހަމަނުޖެހުންތަކަށް އަލިއަޅުއްވާލައްވައި އައްބާސް ވިދާޅުވީ، އިޒްރޭލުން ގޮންޖެހުންތައް ކުރިމަތިކުރުވި ނަމަވެސް ފަލަސްތީނުގެ އެތުލީޓުން އަންނަނީ ދުނިޔޭގެ މައިދާނުގައި ފަލަސްޠީނުގެ ސާބިތުކަން ރަމްޒުކޮށްދީ، ހިތްވަރާއެކު މޮޅު ކުޅުމެއް ދައްކަމުން ކަމަށެވެ. މި ހާލަތު އޭނާ ސިފަކުރެއްވީ ކުޅިވަރުގެ ވަސީލަތްތައް ހިމެނޭ ގޮތަށް ޣައްޒާގެ އުމްރާނީ ވަސީލަތްތަކަށް ބޮޑެތި ގެއްލުންތަކެއްދީ، ފަލަސްޠީނުގެ ބިންތަކަށް ނުޙައްޤުން ވެރިވެ ތިބި އިޒްރޭލުގެ ޔަހޫދީ ބައިގަނޑު ހިންގަމުންދާ ފަނާކުރަނިވި ހަނގުރާމައަށް އިޝާރާތްކުރައްވައެވެ.
ޢައްބާސް ވަނީ، އިޒްރޭލުން ފޭރިގެންފައިވާ ފަލަސްތީނުގެ ބިންތަކާއި، ވަށާލާފައިވާ ޣައްޒާއާއި، ހިފާފައިވާ ހުޅަނގު އައްސޭރިއާއި އިރުމަތީ ގުދުސްގައި ސަހްޔޫނީ ގުންޑާއިން ހިންގަމުންދާ އަނިޔާވެރި ޢަމަލުތައް ހުއްޓުވަން ކުރައްވަމުން ގެންދަވާ މަސައްކަތްތަކުގެ މައްޗަށް ވެސް އަލިއަޅުވާލައްވައިފައެވެ.
