އަސްކަރީ ނުތަނަވަސްކަން އިތުރުވަމުންދާ މި ދަނޑިވަޅުގައި، ޔޫކްރެއިންގެ އޮޕަރޭޝަންތަކުގެ މުހިންމު ލޮޖިސްޓިކް ހަބެއްގެ ގޮތުގައި ބޭނުންކުރަމުން އައި ޑޮނެޓްސްކް އޮބްލާސްޓްގެ ޕޮކްރޮވްސްކްއަށް ރަޝާ ސިފައިން މިސްރާބު ޖަހާފައިވާތީ އެ ސިޓީ ހުސްކުރުމަށް ޔޫކްރެއިންގެ ޢާންމުންނަށް އެގައުމުން ކުއްލި ގޮތަކަށް އިލްތިމާސްކޮށްފިއެވެ.
ފަހުގެ ރިޕޯޓްތައް ބުނާގޮތުން، ރަޝާސިފައިން މިހާރު ތިބީ ޕޮކްރޮވްސްކްގެ ބޭރުން ގާތްގަނޑަކަށް 10 ކިލޯމީޓަރު ދުރުގައެވެ. އަދި އޭގެ ސަބަބުން އެ ސަރަޙައްދުގައި ވަރުގަދަ ކުރިމަތިލުންތައް ހިނގައިދާނެ ކަމުގެ ބިރު އެބައޮތް ކަމަށް ޔޫކްރެއިނުން ބުނެއެވެ.
ރަޝާގެ އަސްކަރީ ޙަރަކާތްތައް އެހެން ދިމާލަކަށް އަނބުރާލުމުގެ މަގުސަދުގައި ޔޫކްރެއިންގެ އަސްކަރިއްޔާއިން ރަޝިޔާގެ ކުރުސްކް ސަރަޙައްދަށް އަރައިގަތް ނަމަވެސް، ޕޮކްރޮވްސްކާ ދިމާލަށް މިސްރާބު ޖަހާފައިވާ ރަޝާގެ ފައުޖުތަކަށް އޭގެ ސަބަބުން ހުއްޓުމެއް އައިކަމަކަށް ނުބެލެވެއެވެ. އަދި ޔޫކްރެއިނުން އެޅި ސްޓްރެޓެޖިކް ފިޔަވަޅުގެ މަޤުސަދާ ޚިލާފަށް، ޔޫކްރެއިންގެ މި މުހިންމު ސިޓީއާ ދިމާލަށް ރަޝާ ސިފައިން ކުރިއަރަމުން އައި ދުވެލި ވަނީ ދެގުނަ ބާރުވެފައެވެ.
މި ސަރަހައްދުގެ ޙާލަތު އޮތްގޮތުން މިހާރު ދޭހަކޮށްދެނީ، މިހާރު ހިނގަމުންދާ ހަނގުރާމައިގެ ނުރައްކާ އިހުނަށްވުރެވެސް އިތުރުވަމުންދާ ކަމެވެ. އަދި، ދެފަރާތުންވެސް ހަނގުރާމައިގެ މިސްރާބަށް ބޮޑެތި ބަދަލުތަކެއް ގެންނަމުންދާ ކަމެވެ.
ޔޫކްރެއިނުން އެގައުމުގެ މަދަނީ އާބާދީ ހިމާޔަތްކުރަން މަސައްކަތް ކުރަމުންދާއިރު، ސަރަޙައްދުން ކުއްލިގޮތަކަށް މީހުން ހުސްކުރުމުގެ މި އަމުރަކީ ހާލަތުގެ ސީރިއަސްކަން ދައްކުވައިދޭ އަމުރެކެވެ.
