އިޒްރޭލާ ދެކޮޅަށް އަސްކަރީ ފިޔަވަޅެއް އަޅައިފިނަމަ އެކަމުގެ ސަބަބުން އީރާނަށް ކުރިމަތިލާން ޖެހޭނޭ ނަތީޖާ ނުރައްކާތެރިވާނޭ ކަމަށް ބުނެ، އިޒްރޭލުން ހިންގާ ލާއިންސާނީ ޢަމަލުތަކުގެ ބައިވެރިޔާ، އެމެރިކާއިން އީރާނަށް ވަރުގަދަ އިންޒާރެއް ދީފިއެވެ.
މެދުއިރުމަތީގައި ނުތަނަވަސްކަން އިތުރުވެފައިވާ ދަނޑިވަޅެއްގައި، ހާއްސަކޮށް ތެހެރާނުގައި ހަމާސްގެ އިސް އޮފިޝަލަކު އަވަހާރަކޮށްލުމާ ގުޅިގެން، އެމެރިކާއިން އީރާނަށް އިންޒާރު ދީފައި މި ވަނީ، ހަމާސްގެ ލީޑަރު އިސްމާޢީލް ޙަނިއްޔާ އަވަހާރަކޮށްލުމުގެ ތުހުމަތުގައި އީރާނުން ރައްދެއް ދީފާނޭކަމުގެ އަޑު ފެތުރިފައި ވަނިކޮށެވެ.
އީރާނަށް އިންޒާރު ދިނުމުގެ އިތުރުން އެމެރިކާއިން ވަނީ އެ ސަރަހައްދުގައި އެގައުމުގެ އަސްކަރީ ބާރުތައް އިތުރުކޮށް، އިސްރާއީލުގެ ދިފާއުގައި ކޮންމެ ފިޔަވަޅެއް އަޅަންވެސް ތައްޔާރަށް އޮތްކަމުގެ އިޝާރާތެއް ދީފައެވެ.
ބައިނަލްއަގްވާމީ މުޖުތަމައުން ދަނީ ޣައްޒާގައި ހިނގަމުންދާ ހަނގުރާމަ ހުއްޓާލުމުގެ މަޝްވަރާތައް ރޭލުން ކައްސާލައި، ހާލަތު ގޯސްވުން ހުއްޓުވުމުގެ އުންމީދުގައި ކަންކަން ވަރަށް ގާތުން ބަލަމުންނެވެ.
އެމެރިކާއިން ބުނެފައި ވަނީ، އެގައުމުގެ ސްޓޭންޑް ވަރަށް ސާފު ކަމަށެވެ. އެގޮތުން އީރާނުން އަޅާ ކޮންމެ އުދުވާނީ ފިޔަވަޅަކުން ވެސް އީރާނަށް އޭގެ ގެއްލުން ބޮޑުވާނޭ ކަމަށާއި އަދި އެ ސަރަހައްދުގެ ސުލްހަ ގާއިމް ކުރުމަށް ކުރާ މަސައްކަތްތައްވެސް ރޫޅިގެންދާނޭ ކަމަށެވެ.
މިކަމުގެ ސަބަބުން، ޣައްޒާގައި މިހާރު ކުރިއަށްދާ ހަނގުރާމަ ހުއްޓާލުމުގެ މަޝްވަރާތައް ހުއްޓުމަކަށް ނާންނާނޭ ކަމުގެ އުއްމީދުގައި ބައިނަލްއަގްވާމީ މުޖުތަމައުން ދަނީ ހާލަތު ވަރަށް ގާތުން ބަލަމުންނެވެ.
