ރާއްޖޭގައި ފުރަތަމަ ފަހަރަށް ފޮރިން ސެކްރެޓަރީގެ މަގާމަށް އަންހެން ބޭފުޅަކު އައްޔަންކޮށްފިއެވެ.
ރައީސް ޑރ. މުހައްމަދު މުއިއްޒު މިއަދު އެ މަގާމަށް އައްޔަންކުރެއްވީ ފާޠިމަތު އިނާޔާއެވެ. އެ ކަމަނާއަށް މަގާމުގެ ފަތްކޮޅު ދެއްވީ އެކަމަށްޓަކައި ހެނދުނު ރައީސް އޮފީހުގައި ބޭއްވެވި ރަސްމިއްޔާތެއްގައެވެ.
ޢިނާޔާ އެންމެ ފަހުން ހުންނެވީ ފޮރިން މިނިސްޓަރުގެ ނައިބުގެ މަގާމުގައެވެ. އޭނަ ފޮރިން ސެކްރެޓަރީގެ މަގާމަށް ޢައްޔަނުކުރެއްވީ ސްޓޭޓް މިނިސްޓަރު ފެންވަރުގައެވެ. އަދި މިއީ ރާއްޖޭގެ ތާރީހުގައި ވެސް ފޮރިން ސެކްރެޓަރީގެ މަގާމަށް އަންހެން ބޭފުޅަކު ޢައްޔަންކުރި ފުރަތަމަ ފަހަރެވެ.
އަންހެނުން ބާރުވެރިކުރުވައި ހަމަހަމަ ފުރުސަތު ހޯދައި ދިނުމަކީ މި ސަރުކާރުގެ މުހިންމު ސިޔާސަތެކެވެ.
